Sot është dita e katër ku serbët kanë bllokuar rrugët dhe po protestojnë kundër vendimit për reciprocitetin e targave. Mediat vendase shkruajnë se rrugët kryesore në Jarinjë dhe Bërnjak janë ende të bllokuara, por nata ka kaluar pa incidente.
Serbët kanë qëndruar gjatë gjithë natës në të dy pikëkalimet kufitare në veri të Kosovës, pavarësisht shiut dhe temperaturave të ulëta. Kolona e mjeteve është e gjatë rreth 3 kilometra e gjysmë, ndërkohë që mësohet se gjatë natës së mbrëmshme është shtuar numri i kamionëve dhe mjeteve të tjera të rënda me të cilat është bllokuar rruga. Serbët gjithashtu për të bllokuar rrugën kanë vendosur inerte të shumta në rrugë.
Në Jarinjë dhe Bërnjak janë vendosur edhe forca të shumta të Njësisë Speciale të Policisë së Kosovës. Ndërkohë që mediat serbe ka shkruar se Policia e Kosovës ka dhunuar 3 serbë . Serbët lokalë kanë protestuar me thirrje e këngë nacionaliste.
Zëdhënësi i Policisë së Kosovës, Baki Kelani ka bërë të ditur se situata është e njejtë, përveç një pjese me zhavorr të vendosur si pengesë.
“Situata është pothuajse e njëjtë. Ka pengesa në të dyja anët. Është tash edhe një pjesë me zhavorr që e kanë vendosur si pengesë. Situata është e qetë në përgjithësi dhe si çdo herë Policia e Kosovës po bën punën e saj në mënyrën më të mirë”, tha Kelani.
Qeveria e Kosovës mëngjesin e të hënës nisi zbatimin e reciprocitetit për targat duke vënë të përkohshmet për veturat e Serbisë që futen në territorin e Kosovës. Kjo gjë nuk u prit mirë dhe e tensionoi shumë situatën në veri të vendit ku qytetarët serbë në shenjë proteste bllokuan rrugët në Bërnjak dhe Jarinjë.
