Reforma zgjedhore, por edhe mbështetja ndaj kandidatit Emri Vata, ishin në qendër të mbledhjes së grupit të deputetëve demokratë, që u mblodhën në tryezën e 3-të të takimeve në Kukës.
Gazment Bardhi me cilësinë e kryetarit të Grupit Parlamentar tha se Oerd Bylykbashi do të jetë bashkëkryetari i Komisionit të Posaçëm për reformën zgjedhore, ndërsa theksoi se Edi Rama nuk mund t’I caktojë opozitës përfaqësuesit e saj në komisionet parlamentare, të përhershme apo të posaçme.
Referuar vendimit të miratuar në mbledhjen e sotme, Bardhi tha se përveç deputetit Bylykbashi, janë propozuar si anëtarë për komisionin e reformës zgjedhore Dhurata Çupi, Dashnor Sula, Ervin Salianji, Tomorr Alizoti, Lindita Metaliaj, Shpëtim Idrizi, Fatmir Mediu dhe Petrit Vasili.
“Për ne është e papranueshme që në dy vite komisioni i reformës zgjedhore nuk ka prodhuar asnjë rezultat duke favorizuar vjedhjen e zgjedhjeve nga Rama”, tha Bardhi.
Në vijim ai shtoi se me cilësinë e kryetarit të grupit parlamentar është konsultuar edhe me deputetët e PDIU-së lidhur me aksionin e opozitës në Kuvend, por edhe me emrat që propozohen përsa i takon komisioneve.
Discussion about this post