Kreu i Komisionit Qendror të Zgjedhjeve, Ilirjan Celibashi ka bërë thirrje për nisjen nga puna të Komisionit për Reformën Zgjedhore, që sipas tij duhet të ngrihet në përmbushje me propozimet e OSBE/ODIHR.
Celibashi shkruan se data e zgjedhjeve të ardhshme vendore nuk është larg, ndërsa parashtron një sërë çështjet që duhet të zgjidhen me nisjen nga puna të këtij Komisioni.
“Partitë politike parlamentare dakordësuan krijimin e komisionit parlamentar të posaçëm për reformën zgjedhore. KQZ sjell në kujtesë të këtyre partive domosdoshmërinë për fillimin sa më parë të punës për përmbushjen e rekomandimeve të OSBE/ODIHR. Zgjedhjet e ardhshme vendore nuk janë larg. Data 16 Prill 2023 është data e parë e mundshme për zhvillimin e këtyre zgjedhjeve. Data 14 Maj 2023 është data e fundit. Përbërja dhe funksionimi i administratës zgjedhore, procedurat e nxjerrjes së rezultatit, financimi, ankimimet dhe sanksionet administrative, fushata në media përfshi edhe atë online përdorimi i fondeve publike në fushatë, digjitalizimi janë disa nga çështjet që KQZ vlerëson se duhet të marrin vëmendjen për reformim prej komisionit të posaçëm parlamentar”, shkruan Celibashi.
Vettingu i politikanëve, Reforma Territoriale dhe Reforma Zgjedhore ka qenë një nga kërkesat e PD, e cila mori dritën jeshile dhe nga mazhorancës, megjithëse përplasjet pritet të mos mungojnë.
Discussion about this post