Italia ka vendosur të mbyllë përkohësisht kufijtë ajrorë dhe detarë me Spanjën, në përgjigje të krizës së emigrantëve në Ceuta dhe shqetësimeve për sigurinë e kufijve të zonës Schengen.
Vendimi është marrë nga Ministria e Brendshme italiane pas një analize të situatës në Komitetin për Analizën e Emigracionit dhe Sigurisë së Kufijve, mbledhje e drejtuar nga ministri i Brendshëm, Matteo Piantedosi.
Paralelisht, Piantedosi zhvilloi një bisedë telefonike me homologun e tij francez, Laurent Nuñez, gjatë së cilës u ra dakord për forcimin e kontrolleve në kufirin tokësor mes Italisë dhe Francës, në kuadër të bashkëpunimit mes autoriteteve policore të dy vendeve.
Ministri i Jashtëm dhe zëvendëskryeministri italian, Antonio Tajani, mbrojti vendimin për pezullimin e përkohshëm të zbatimit të rregullave të Schengenit me Spanjën, duke e cilësuar atë një masë të domosdoshme për garantimin e sigurisë.
Në një reagim në rrjetin social X, Tajani deklaroi se pezullimi i përkohshëm është një zgjedhje e nevojshme për mbrojtjen e qytetarëve italianë dhe të kufijve të Bashkimit Evropian.
Sipas tij, kriza migratore në Ceuta tregon se mbrojtja e kufijve të jashtëm të Bashkimit Evropian është një përgjegjësi e përbashkët e të gjitha shteteve anëtare.
“Duhet të punojmë së bashku për të parandaluar hyrjen e flukseve të pakontrolluara të emigrantëve në territorin e Bashkimit Evropian, me të gjitha rreziqet që kjo sjell, përfshirë kërcënimin e terrorizmit, i cili duhet të luftohet pa asnjë hezitim”, deklaroi Tajani.
gijotina.com/
Discussion about this post