Gjatë marshimit, pedagogët kanë bërë thirrje se nuk do të tërhiqen nga qëndrimi i tyre, duke kërkuar mbështetje të vazhdueshme për studentët dhe kundërshtuar dhunën ndaj tyre.
Pedagogët dëgjohen duke thirrur “Dorëheqje”, në drejtim të kryeministrit Edi Rama. Një nga kërkesat e tyre është që tubimet në mbështetje të studentëve të vijojnë çdo ditë në orën 10:00, për të shprehur solidaritetin me ta.
Pas marshimit, studentë, pedagogë, akademikë dhe qytetarë të tjerë janë mbledhur para Kryeministrisë, ku kanë refuzuar thirrjen për dialog të përcjellë nga drejtoresha e MIA-s, Manjola Hasa.
Protestuesit kanë vijuar thirrjet kundër kryeministrit Edi Rama, ndërsa mes sloganeve që dëgjohen para godinës së qeverisë është edhe “Arrestoni Ramën!”. Ata kërkojnë gjithashtu lirimin e studentëve të ndaluar.
“Pa rini nuk ka Shqipëri” është një tjetër thirrje e protestuesve, të cilët vijojnë të qëndrojnë para Kryeministrisë, duke shprehur kundërshtimin ndaj qeverisë dhe duke këmbëngulur në kërkesat e tyre.
Protestuesit kanë këmbëngulur se dorëheqja e kryeministrit është kushti kryesor për dialog. “Pa dorëheqje s’ka dialog”, ishte një nga thirrjet e tyre gjatë protestës.
“E duam Shqipërinë pa Edi Ramën”, ishte një tjetër thirrje e përcjellë nga protestuesit.
Pedagogët dhe studentët kanë bërë të qartë se nuk pranojnë dialogun në këto kushte dhe se do të vijojnë të protestojnë në mbështetje të studentëve dhe kërkesave të tyre.
“Në asnjë mënyrë nuk mund të ketë bisedime. Rama dialogut i është përgjigj me dhunë. Pati mundësi 5 muaj për dialog dhe për t’iu përgjigj kërkesave të rektoratit dhe studentëve po iu përgjigj me dhunë. Tani populli kërkon dorëheqjen e tij. Pedagogët mbështesin studnetët. Do dalim çdo ditë si sot para Universiteti Politeknik dhe do të vijimë këtu në mbështetje të studentëve”,- u shpreh një pedagog.
Discussion about this post