Prokuroria i dha urdhër mediave sot që të ndalohej publikimi i informacionit për e-mailet e hakeruar.
Menjëherë pas këtij vendimi, ka ardhur dhe reagimi i kryetarit të Partisë Demokratike Sali Berisha.
Ai thotë se e dënon këtë akt, duke e cilësuar si antikushtetues dhe policesk të kryeministrit Edi Rama.
Berisha i bëri thirrje mediave që të refuzojnë vendosjen e censurës që karakterizon regjimet moniste.
Reagimi i plotë:
Stop censurës së shtetit monist! Të dashur miq, pas shpartallimit të plotë, në një agresion të vërtetë nga hakcerët iranian të të gjithë infrastrukturës dixhitale dhe nxjerrës në treg të të gjithë të dhënave personale të qytetarëve shqiptarë dhe të dhënave zyrtare sekrete të shtetit të kashtës së Edi Ramës, prokuroria e partisë, me urdhër policesk, urdhëron mediat të mos publikojnë të dhënat e publikuara për mbarë botën. Dënoj me ashpersinë më të madhe këtë akt antikushtetues, policesk, të Edi Ramës, si një përpjekje të shëmtuar për të rikthyer censurën në Shqipëri. Shpreh mbështetjen e plotë të Partisë Demokratike për mediat dhe ju bëj thirrje të refuzojnë me guxim çdo përpjekje të regjimit, për të vendosur censurën që karakterizon regjimet moniste si ky i Edi Ramës.
Discussion about this post