Maxhoranca dhe opozita kanë bashkuar votat në Komisionin e Ligjeve për miratimin e projektligjit për krijimin e një regjistri kombëtar që do të mbajë të dhënat e personave të dënuar për krime seksuale.
Votimi u bë ditën e sotme ndërkohë që asnjë nga deputetët nuk votoi kundër. Vendimi u përshëndet nga të dyja palë si shenjë e vullnetit të mirë të bashkëpunimit në interes të qytetarëve. Nismëtarja e këtij projektligji Erisa Xhixho falenderoi kolegët e të dyja palëve në këtë komision.
“Edhe unë kam një falenderim. Faleminderit kolegëve dhe institucioneve që kanë bashkëpunuar për draftin. Faleminderit që keni marrë parasysh sugjerimet tona që të jetë një ligj sa më i mirë. Uroj që të enjten në seancë të jemi pro këtij ligji”, tha ajo.
Ndërsa Iris Luarasi një nga mbështetëset e këtij propozimi njoftoi edhe nismën e radhës që do të paraqesin në Kuvend për mbrojtjen nga krimet seksuale.
“Dua të falenderoj ju të gjithë për bashkëpunimin. Dua të falenderoj qytetarët që e kanë mbështetur. Me firmat e 22 mijë qytetarëve mund të bëhen ndryshime. Shumë shpejt duam të sjellim kastrimin seksual. Kastrimi seksual është pilula që ul dëshirën për të sulmuar seksualisht. Nuk është e pakthyeshme. Ka një efekt 2 deri në 4 vjet. Duhet të jemi koshientë që në një vend të varfër pjesa e monitorimit është shumë e vështirë. Të gjithë ata që janë prindër e dinë shumë mirë që kjo do ishte më e pakta që mund të kërkonin”, tha Luarasi.
Nënkryetarja e Kuvendit Ermonela Felaj vuri theksin te bashkimi i forcave për një kauzë. “Falenderoj kolegët e opozitës. Kur nuk futet politika në mes ne marrin më të mirën nga njëri tjetri. Dhe kjo duket”, u shpreh ajo.
Discussion about this post