Një dilemë e madhë gjatë këtyre ditëve është ajo e studentëve, që ka lidhje me vaksinimin. Kur na ndajnë pak javë nga fillimi i vitit të ri akademik, studentët duhet të vendosin karshi këtij detyrimi.
Për rreth dy vite, mësimi për studentët u zhvillua online, si shkak i tërmetit por edhe i pandemisë covid 19, duke i mbajtur ata jashtë dyerve të fakulteteve.
Këtë vit, studentëve u është komunikuar nga autoritetet shëndetësore dhevetë kryeministri Rama, se kthimi në auditorë varet nga vaksinimi i tyre.
“Pavarësisht deklaratave politike, nuk është një proces i detyruar” – u shpreh Artan Hoxha, rektor në universitetin e Tiranës .
“Ne e kemi gati protokollin. Leksionet do t’i zhvillojmë online, ndërsa seminaret me pak studentë si dhe me dy turne”, thotë Arben Gjata, rektor i universitetit të mjekësisë.
Ndërkohë, një problem i cili po shqetëson rektorët e universiteteve mbetet dhe është akreditimi i tyre.
Paralelisht me këto shqetësime, universitetet në bashkëpunim me ekzekutivin dhe Ministrinë e Arsimit duhet të çojnë përpara edhe një nga ligjet më të debatuar, atë të arsimit të lartë.
Rikujtojmë, që në fillimit të muajit shtator ministria e shëndetësisë, komiteti i ekspertëve, por edhe vetë kryeministri Rama janë shprehur para mediave se vaksinimi do të jetë me detyrim për të gjithë studentët, të cilët duan të ndjekin vitin akademik. Ndërkohë, studentët kanë paralajmëruar edhe një tjetër protestë, ditën e shtunë.
Ende nuk dihet çfarë do të ndodh me fatin e atyre studentëve të cilët nuk duan të vaksinohen, në qoftë se do të lejohen të vijojnë studimet apo do të detyrohen t’i humbasin ato.
Sipas burimeve të gijotina.com nga studentët e mjekësisë, protesta do të vijojnë deri në momentin që fjala e tyre do të dëgjohet, e në qoftë se ndodh e kundërta , mund të ketë edhe bojkot te mësimit.
