Rektori Draçini në hapat e Arben Gjatës: Denoncohet tenderi 370 milionë lekë i riparimeve në UMT

Xheladin Draçini me të ardhur në krye të Universitet të Mjekësisë Tiranë e gjeti lehtë rrugën që i kishte shtruar paraardhësi me projektet qindra milionë lekëshe.

Draçini është emëruar në zgjedhjet e fundit për universitet, duke zëvendësuar Arben Gjatën, i cili u mënjanua pasi kishte dosje në SPAK.

Kujtojmë se Arben Gjata nuk kandidoi më në zgjedhjet e qershorit për universitet, por ai në fakt duhej shkarkuar më parë. Gjata është marrë nën hetim si “i pandehur” nga SPAK dhe me vendim të Gjykatës së Posaçme, është vënë nën masën penale “Detyrim paraqitje” tek oficerët e Byrosë Kombëtare të Hetimit.

Rektori Arben Gjata është nën hetim për veprat penale të mashtrimit zyrtar në bashkëpunim, falsifikimit të raporteve të kostove financiare publike dhe favorizim subjektesh private, në aferën e koncesionit të sterilizimit të pajisjeve kirurgjikale, me pasojë vjedhjen e 80 milionë Euro nga buxheti i shtetit.

Më 14 shtator 2023, SPAK dhe Gjykata e Posaçme, i dërguan Ministres së Arsimit, Ogerta Manastirliu dhe Senatit Akademik të Universitetit Mjekësor, dosjen penale dhe vendimin e përbashkët për rektorin Arben Gjata, si person nën hetim “i pandehur me detyrim paraqitje”. Por pavarësisht kësaj asnjë masë nuk u mor.

Denoncimi

Duke parë këtë situatë që paraardhësit nuk i ka hyrë akoma ndonjë gjemb në këmbë, edhe Draçini po ndjek hapat e Gjatës.

Në kuadër të projektit rinovues, stafi i administrimit   të Universitetit të Mjekësisë ka organizuar në tetor 2024 tenderin me objekt “Rikonstruksion Objekti, Heqje dhe Furnizim-Vendosje Dyer dhe Dritare për FSHMT, Tiranë”, me fond limit afro 400 milionë lekë pa llogaritur TVSH.

Rektor i ri godinë e re. Me kaq lekë mund  të bëhet gjithçka nga e para në këtë ndërtesë. Në tënder është favorizuar firma “INA” SHPK, në pronësi të Ferdinand Çaushit.

Kompania e tij ka marrë në dorë pa garë tenderë për riparime shkollash, spitalesh dhe tani edhe universitetin. Gjithsesi, plani i reaktorit, administratorit dhe komisionit të vlerësimit të ofertave është pezulluar zyrtarisht.

Mësojmë se shkaku i pezullimit të procedurës së tenderit është denoncimi i bërë në KPP nga nj prej operatorëve ekonomik pjesëmarrës.

Në datën 12 nëntor 2024 pranë Komisionit të Prokurimit Publik, është administruar ankesa e operatorit ekonomik “KEVIN CONSTRUKSION” SHPK, e cila është kompania e vëllait të ish-kryetarit të Bashkisë Kukës, Safet Gjici, që vuan dënimin për shpërdorim detyre. Nga shqyrtimi paraprak i ankesës së sipërcituar, u konstatua se objekti i ankesës lidhet me vendimmarrjen e Komisionit të Vlerësimit të Ofertave mbi kualifikimin e ofertës të paraqitur nga operatori ekonomik “INA” SHPK në procedurën e mësipërme.

Konkretisht ankimuesi pretendon se firma “INA” SHPK është kualifikuar edhe pse në fakt nuk plotëson disa kritere të tenderit.

Sipas “KEVIN CONSTRUKSION” SHPK, Autoriteti Kontraktor nuk ka marrë fare me shqyrtimet e ofertave, por ka vazhduar programin me një fitues që ka qenë i paracaktuar.

Prandaj, në këtë ankesë kërkohet që të merren në konsideratë dhe të analizohen dokumentet për çdo operator që ka shfaqur interes.

Do të presim se çfarë vendimi do të marrë KPP, por shkelja e kritereve që i ka vendosur vetë Universiteti i Mjekësisë në këtë tender do të thotë shkelje e barazisë në tender.