Rektorja e Universitetit “Luigj Gurakuqi” Shkodër, Rajmonda Kçira, blen 37 milionë lekë perde. Duket sikur janë zgjidhur të gjitha problemet e studentëve dhe tashmë duhen këto perde luksi. Pak ditë më parë, Gijotina.com raportoi se si KPP anuloi tenderin e denoncuar dy herë për blerje pajisjesh në këtë universitet
Por, paska akoma! Kçira ka zhvilluar edhe një tender tjetër, atë me numër reference REF-83482, më 10 dhjetor 2023, me objekt: “Furnizim vendosje Perde”, me fond limit 3,749,961.00 lekë (pa TVSH) zhvilluar më datë 23 dhjetor 2023, nga autoriteti kontraktor Universiteti Luigj Gurakuqi Shkodër.
Pra, më shumë se 37 milionë lekë do të shpenzojë rektorja vetëm për perdet e universiteti! Në momentin që fituesi po merr paratë dhe do të vendosë perdet e porositura, firma pjesëmarrëse në këtë tender “Bajro Bros” SHPK ka dorëzuar një ankesë në Komisionin e Prokurimeve Publike.
Kjo firmë pretendon se dy oferta të tjera janë kualifikuar si të vlefshme, edhe pse nuk përmbushin kriteret. Këtë ankesë kompania e ka dërguar edhe në Komisionin e Vlerësimit të Ofertave pranë universitetit, por rektorja vazhdon të këmbëngul në vendimin e vet. Megjithatë, vendimi i KPP nxjerr në shesh të palarat e tenderit për perdet.
Sipas KPP, firma ‘NETA SHYTI’, e cila ka një nga ofertat e kualifikuara nuk ka paraqitur dokumentet e kërkuara origjinale për fazën tjetër, fakt që komisionin i Kçirës e ka anashkaluar.
Por KPP ka dyshimet e veta, edhe pasi Universiteti ka këmbëngulur se ‘Neta Shyti’ ka dorëzuar dokumentet e nevojshme dhe ka prezantuar dosjen.
Komisioni vëren se ka mangësi të dokumenteve të rëndësishme.
“Nga verifikimi i dokumentacionit të dorëzuar nga autoriteti kontraktor Universiteti “Luigj Gurakuqi” Shkodër, Komisioni i Prokurimit Publik konstaton, se mungon akti dëshmi Penaliteti personale, e cila rezultonte të ishte listuar si akt në listën e inventarit të dorëzuar nga operatori ekonomik “Neta Shyti” PF, protokolluar me nr. 2586/12 prot., datë 06.11.2023, i cili është akt që lidhet drejtpërdrejte me dokumentacionin, i cili duhet të ishte dorëzuar nga operatori ekonomik “Neta Shyti” Pf, në kuadër të vërtetimit të kritereve të përgjithshme të kualifikimit, të deklaruara në Formularin Përmbledhës të Vetëdeklarimit, për procesin e administrimit të të cilave edhe ankimuesi ka ngritur pretendime”, thuhet në vendimin e KPP.
Prandaj, në përfundim Komisioni i Prokurimeve Publike vendosi që të pranojë ankesën e firmës “Bajro Bros” SHPK dhe i kërkon Universiteti të Shkodrës që të anulojë tenderi derisa të korrigjohen gabimet e bëra.
Është e qartë se rektorja Kçira po fshihet prapa perdeve për t’i dhënë kompanisë së paracaktuar 37 milionë lekë. Drejtuesja e këtij institucioni duket jashtë kontrollit të ministrisë.
Kështu do të ndodhte, kur ministre e Arsimit dhe e Sportit do të emërohej Ogerta Manastirliu (ish ministre e Shëndetësisë) që është e zënë me përgjigjet që i jep SPAK-ut për koncesionin e Sterilizimit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post