Kosova ka shënuar një rekord të numrit të viktimave nga Covid-19, ku në 24 orët e fundit humbën jetën 30 persona. Ministria e Shëndetësisë në Kosovë, sipas të dhënave nga Instituti Kombëtar i Shëndetësisë Publike, ka njoftuar se nga 9.415 testime, 685 qytetarë kanë rezultuar pozitiv me virusin Covid-19.
Gjithashtu, janë shënuar 30 viktima dhe janë shëruar 1.384 qytetarë, ndërsa numri i përgjithshëm i të shëruarve është 133.314.
Gjatë ditëve të fundit, Kosova ka shënuar shifrat të larta infektimi me Covid, ku vetëm ditën e djeshme 703 qytetarë janë infektuar nga virusi, ndërsa janë shënuar 19 humbje jete. Sot qeveria e Kosovës njoftoi gjithashtu se është vendosur që të shtyhet viti i ri shkollor për më 26 shtator, ndërsa fillimisht ishte paralajmëruar për më 13 shtator.
