Një sekuestro preventive është vendosur nga Gjykata e Posaçme kundër Korrupsionit dhe Krimit të Organizuar (GJKKO) mbi një pasuri të paluajtshme në emër të një subjekti tregtar, në kuadër të hetimeve të nisura nga Prokuroria e Posaçme (SPAK) ndaj kryebashkiakut të arrestuar të Tiranës, Erion Veliaj, dhe bashkëshortes së tij, Ajola Xoxa. Hetimet ndaj tyre fokusohen tashmë edhe në veprën penale të “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”.
SPAK njofton se ka regjistruar procedimin penal Nr. 27 të vitit 2024, duke hetuar Veliajn dhe Xoxën për një sërë veprash penale, përfshirë korrupsionin pasiv dhe aktiv, pastrimin e parave, deklarata të rreme përpara oficerëve të policisë gjyqësore dhe veprime që pengojnë zbulimin e së vërtetës.
Pas hetimeve paraprake, prokuroria speciale ka arritur në përfundimin se ekzistojnë prova të arsyeshme që Veliaj dhe Xoxe kanë konsumuar edhe elementët e veprës penale të deklarimit të rremë të pasurisë. Për këtë arsye, më 20 maj 2025, emrat e tyre janë regjistruar në regjistrin e njoftimit të veprave penale për këtë akuzë shtesë.
Me kërkesën e SPAK-ut të datës 20 maj 2025, GJKKO vendosi sekuestron preventive të pasurisë së paluajtshme të regjistruar në emër të subjektit tregtar “A. K.” shpk. Sipas të dhënave të mbledhura, ekziston dyshimi i arsyeshëm se Veliaj dhe Xoxe kanë interesa pasurore faktike mbi dy pasuri fqinje me apartamentin e tyre në rezidencën Kodra e Diellit, thotë SPAK.
Hetimet e SPAK-ut po vazhdojnë për të zbardhur të gjitha rrethanat e kësaj çështjeje dhe për të përcaktuar përgjegjësinë penale të personave të përfshirë në hetim.
Veliaj ndodhet pas hekurave nën masën e sigurisë arrest në burg, që prej Shkurtit 2025, ndërsa kërkesat e tij për liri janë refuzuar nga gjykatat. Veliaj dhe bashkëshortja e tij, Ajola Xoxa akuzohen nga Prokuroria e Posaçme se krijuan një skemë korruptive mes kompanive dhe OJF-ve të bashkëshortes dhe një grupi biznesmenësh rreth tij me vlerë transaksionesh prej më shumë se 1 milion euro.
Discussion about this post