Rëndohet situata nga përmbytjet në Greqi, humbin jetën dy persona (Video)

Moti i keq që ka goditur Greqinë prej ditës së djeshme, ka shkaktuar dy viktima në jug të Atikës.

Sipas mediave të huaja, një grua 56-vjeçare humbi jetën pasi u rrëmbye nga ujërat e rrëmbyeshme të shiut. 56-vjeçarja mësohet se po kthehej në shtëpi nga puna.

Ajo u përpoq të kalonte rrugën kur mjeti i saj u rrëmbye nga uji. Viktima mbeti e bllokuar dhe zjarrfikësit nuk arritën ta gjenin gjallë.

Ndërkohë një roje bregdetar 53-vjeçar humbi jetën në krye të detyrës. Sipas Rojës Bregdetare, ai ishte në patrullim këmbësor në port kur një valë e fortë uji e rrëmbeu. Ai mori një dëmtim të rëndë në kokë që rezultoi fatal.

Pamjet e publikuara nga mediat vendase tregojnë rrugë të mbushura me gurë dhe të “pushtuara” nga rrjedha e ujit.