Ka degraduar në përplasje fizike tensioni në lagjen “5 Maji” ku banorët e revoltuar janë përplasur me policinë pasi këta të fundit kanë rrethuar zonën dhe po nisin punë për shembjen e banesave të tyre.
Policia ka blinduar zonën dhe ka nxjerrë jashtë banesave shumë qytetarë, përfshirë edhe fëmijë. Që në orët e para të mëngjesit policia ka shoqëruar disa persona në komisariat dhe u është ndërprerë energjia elektrike 3 banesave të cilat janë planifikuar të prishen ditën e sotme në orën 10:00.
Këto apartamente po shemben në kuadër të procesit të rindërtimit pas tërmetit të 26 nëntorit 2019, ku në këtë zonë është hartuar një plan zhvillimor me blloqe të reja banesash.
Sipas VKM-së, banorët shtëpitë e të cilëve janë parashikuar për t’u shembur, do t’u jepen apartamentet e reja që do të ndërtohen në këtë zonë. Por disa banorë e kundërshtojnë këtë projekt duke thënë se shtëpitë e tyre nuk kanë pësuar dëmtime.
Discussion about this post