RENEA e FNSH ja sa persona u arrestuan në Vlorë. Në pranga edhe vëllai i “Tesit të Selenicës”. Detajet

RENEA dhe FNSH vijojnë operacionin në Vlorë, ndërkohë që ka shkuar në 10 numri i personave të ndaluar.

Mes të ndaluarve është edhe Santilno ose Santiljano Basho, vëllai i Tesi Bashos, i njohur si “Tesi i Selenicës”.

Nga raportimet mësohet se operacioni i RENEA dhe FNSH është në kuadër të megaoperacionit “Tempulli” ku në Vlorë janë firmosur 90 urdhër-arreste, 69 janë ekzekutuar, ndërsa 21 persona ishin shpallur në kërkim.

Policia ende nuk ka dalë me një njoftim zyrtar lidhur me operacionin e mbrëmjes së të dielës, por nga raportimet mësohet se të paktën 5 persona që u kapën në një local në bulevardin Vlorë-Skelë po survejoheshin nga agjentë civilë të policisë.

Ende nuk dihet sepse ata po survejoheshin, ndërsa ka informacione se policia kishte dijeni mbi prezencën e personave të armatosur në lokalin ku u zhvillua operacioni.

Burime policore bëjnë me dije se janë sekuestruar 3 armë zjarri pistoletë, ndërkohë që të arrestuarit dhe të ndaluarit po merren në pyetje në Drejtorinë e Policisë së Vlorës.

Për të paktën 3 prej tyre raportohet se po kërkohen informacione se ku kanë qenë gjatë ditëve të fundit, me cilët persona janë takuar, ndërkohë që nuk dihet se për çfarë dyshon policia, lidhur me këtë verifikim të detajuar.

Dy vëllezërit Basho janë emra të njohur për Policinë dhe autoritetet ligjzbatuese. Ata janë ndaluar në 2019, në atë kohë me urdhër të Gjykatës së Krimeve të Rënda. Në atë kohë akuzoheshin për një gjobëvënie prej 100 mijë euro ndaj një të afërmi të tyre, akuzë kjo që u mohua prej vëllezërve.

Po kush është Tesi Basho?

Tesi Basho është një person me rrezikshmëri të lartë, i dënuar në Itali me burgim të përjetshëm për vrasje, si dhe me precedent të theksuar kriminal në Shqipëri, në fushën e krimeve kundër personit dhe në fushën e narkotikëve.

Ai ka vrarë dy vajza që ushtronin prostitucion në qytetin e Torinos, një prej të cilëve e shfrytëzonte edhe vetë. Ai ishte arrestuar në vitin 2016 në Itali, por vetëm pak kohë më vonë duke shfrytëzuar transferimit e tij pas tërmetit që “shkundi” Italinë, së bashku me dy shok të tjerë qelia u arratis nga dritarja e burgut, me çarçaf dhe shkopa fshese. Ai ra në prangat e policisë më 16 tetor të vitit 2019.