Guvernatori i Basnkës së Shqipërisë, Gent Sejko, në një konferencë për mediat, e ka argumentuar rënien e vlerës së Euros në raport me Lekun, me përmirësimin e aktivitetit ekonomik në vend. Sejko tha se Banka e Shqipërisë nuk mund të ndërhyjë në këtë proces, po paralajmëroi marrjen e masave për të ndihmuar Bankat e nivelit të dytë si dhe bizneset, përsa i takon ristrukturimit të kredive të këqia.
“Hyrja e euros në vend po stimulohet nga flukset e turizmit dhe investimet e huaja. Blerjet e pasurive të paluajtshme nga të huajt dhe remitancat. Për rrjedhojë Banka nuk arsye të ndërhyrje në kursin e këmbimit”, tha Sejko.
Në vijim ai shtoi Banka e Shqipërisë po moniton situatën, por shtoi se ndërhyrjet bëhen në raste të përcaktuara dhe zakonisht kur ka faktorë spekulative.
“Gjithashtu BSH ndërhyn në rast të blerjes së valutës për krijimin e rezervës dhe për këtë ndërhyrje ka një kalendar të përcaktuar paraprakisht. Kemi blerë 120 milionë euro në 6 mujorin e parë dhe do të vazhdojmë blerjet.
Ndërhyjmë në tregun e këmbimit për të ruajtur stabilitetin e çmimeve, si objektivi ynë kryesor, por zakonisht ndodh në një situatë deflacioniste.
Ne jemi në një situatë inflacioniste. Pandemia dhe lufta në Ukrainë e përshpejtoi rritjen e çmimeve. Kjo po ndodh në gjithë botën”, tha Sejko.
Referuar kursit zyrtar të Bankës së Shqipërisë, të mërkurën 1 euro u këmbye me 104.55 lekë, me një rënie prej 0.3 lekësh në raport me ditën e mëparshme, duke arritur në një tjetër rekord minimal historik, që nga viti 2002, kur euro filloi të funksiononte si monedhë fizike.
Që nga fillimi i këtij viti euro ka rënë me 11.5 lekë, ose me gati 10%, ndërsa këmbehet me 14.4 lekë (12.1%) më pak se 5 korriku i një viti më parë.
Discussion about this post