Vijojnë replikat mes kryeministrit Edi Rama dhe kreut të grupit parlamentar të PD-së Gazment Bardhi. Përmes një postimi në “X”, Rama shkruan se për gjithçka ka shpifur, Bardhi duhet të çonte prova në gjykatë! E duke qenë se sipas tij nuk i zotëron këto të fundit, “shtyn seancat me llafe boshe.”
“Një mesazh nga koordinatori juridik i shumë gjyqeve me kënetën. Lexojeni pak: Sot kishim gjyqin për shpifje me Gaz Bardhin. Avokatët e tij kanë këmbëngulur që të mos merren parasysh vendimet e Penales, sepse medemek ato që ka thënë Bardhi janë fakte të njohura publikisht dhe ai thjesht i ka përsëritur. Plus, në parashtrime thoshin Ols Rama ashtu e Ols Rama kështu. Avokati ynë ua ka bërë të qartë që padia është e Edi Ramës dhe bëhet fjalë për deklaratat e Bardhit për kryeministrin që ka fshirë emrin e vëllait nga dosja me prokurorë që pastaj i ka promovuar etj etj…Pra, gjyqi është me Edi Ramën dhe për shpifjet ndaj Edi Ramës, prandaj ata duhet të sjellin prova që të vërtetojnë thëniet e Bardhit. Po natyrisht, ata prova s’kanë dhe s’përdridhen duke shtyrë seancat me llafe boshe. Ju informoj për seancën tjetër. Eh Babale, Babale, s’përdridhu s’përdridhu…”, shkruan Rama.
Pa vonuar, erdhinjë kundërpërgjigje e kreut të grupit parlamentar të PD-së Gazment Bardhi për kryeministrin e vendit Edi Rama. Po përmes një postimi në “X”, Bardhi i thotë Ramës se “koordinatori juridik ose s’e ke kuptuar se çfarë të ka thënë, ose të ka gënjyer”.
“Koordinatori të paska ngrënë “dardha e mollë” pas shpine! Pyete edhe një herë “koordinatorin juridik. Gjasat janë që s’ke kuptuar gjë, sepse jo vetëm s’merr vesh nga ligji, por këtë periudhë je pak i rënduar psikologjikisht. S’ke faj: u bënë shumë dardhë e shumë mollë pas shpine! Deri tek “molla e dardha” e radhës merre qetë, dhe ndaje mendjen kam shpifur për ty apo vlla Olsin!”, shkruan demokrati.
Kujtojmë se kryeministri Edi Rama e ka kallëzuar Bardhin për shpifje. Në padinë me objekt “shpërblim dëmi jopasuror”, Rama kërkon dëmshpërblim në shumën 1 milionë lekë për shkak të deklaratave publike të Bardhit ku ka përmendur emrin e vëllait të tij, Olsi Rama, si të lidhur me anëtarë të një grupi kriminal.
Discussion about this post