Qarku i Lezhës është përfshirë nga reshje shiu me intensitet mesatar dhe herë pas here të dendura, kryesisht në zonën e Zadrimës, ndërsa në pjesën tjetër të territorit reshjet kanë qenë më të lehta. Autoritetet vendore ndodhen në gatishmëri për të menaxhuar situatën dhe për të shmangur përkeqësimin e mundshëm të kushteve.
Sipas raportimeve nga strukturat e Mbrojtjes Civile, në bashkitë Kurbin dhe Mirditë nuk janë evidentuar problematika deri në orët e mesditës. Ndërkohë, në bashkinë Lezhë, si pasojë e reshjeve të dendura, është raportuar rrezik daljeje nga shtrati i lumit Gjadër, i cili bashkohet me lumin Drin në fshatin me të njëjtin emër. Po ashtu, kanali i parë në fshatin Kodhel ka dalë nga shtrati duke shkaktuar përmbytje të disa sipërfaqeve të tokave bujqësore aty pranë.
Furnizimi me ujë të pijshëm vijon normalisht në të gjitha zonat e qarkut. Në fshatin Krajnë, njësi administrative Blinisht, është raportuar ndërprerje e energjisë elektrike, ku ekipet e OSHEE-së po punojnë për riparimin e defekteve.
Hidrovorët janë në gatishmëri dhe vihen në punë sipas prurjeve të ujit në kanale, ndërsa niveli i lumit Drin ka pësuar një rritje të lehtë, por mbetet brenda parametrave normalë. Ndërkohë, lumi Mat ndodhet në kuota minimale.
Autoritetet lokale dhe strukturat e emergjencave civile vijojnë monitorimin e situatës në terren dhe mbeten në kontakt të vazhdueshëm për çdo zhvillim të mundshëm.
Discussion about this post