Reshjet intensive të shiut që kanë pushtuar vendin prej një jave, kanë ndikuar në rritjen e prurjeve në kaskadën e Drinit, duke bërë që Shqipëria të mos importojë energji elektrike për të furnizuar vendin.
Në total, prodhimi i energjisë elektrike rezulton se është afërsisht 20 mijë megavatorë në ditë në të tre HEC-et. Sipas Korporatës Elektronergjetike Shqiptare, prurjet në kaskadën e Drinit kanë arritur në 1481 m3/s nga 85 m3 në sekondë që kanë qenë dy javë më parë.
Po ashtu edhe niveli i ujit në liqenin e Fierzës ka arritur të kalojë pikën kritike ndërsa niveli i regjistruar është 270,23m.
KESH bën me dije se në Fierzë aktualisht po prodhohet energji elektrike por jo me kapacitet të plotë me qellim rritjen e rezervës energjetike, ndërsa në dy HEC-et e tjera po prodhohet me kapacitet të plotë.
Pak muaj më parë qeveria ka shpallur emergjencë energjetike në vend ndërsa çmimi i energjisë elektrike në bursë arriti në nivele rekord pasi shumë vende ishin në krizë energjetike.
Discussion about this post