Mbështetës të kryebashkiakut të zgjedhur të Himarës, Fredi Beleri, i cili është lënë në burg nën akuzë e blerjes së votës, janë mbledhur sot (1 shkurt) në shenjë proteste para Gjykatës Kushtetuese.
Më pankarta në duar, ku shkruhet “Mbroni Kushtetutën”, “Respektoni vullnetin e popullit”, qytetarët kërkojnë lirimin e Belerit për t’u betuar si kryetar i bashkisë së Himarës.
Në kërkesën e tyre drejtuar GJK, ata kërkojnë që të caktohet një datë sa më shpejt të jetë e mundur për gjykimin e kërkesave që ka bërë Beleri.
Deklarata:
Sot jemi përpara GJK për të mbrojtur dhunimin e rëndë që po i bëhet kryetarit të zgjedhur të Himarës, Fredi Beleri, i cili nuk po lejohet të betohet në detyrë.
E nderuar kryetarja e GJK, ju keni një datë për gjykimin e disa kërkesave që ka bërë Beleri, ankimi ndaj masës së paligjshme të sigurimit në institucionin e paraburgimit ka katër muaj që është përpara jush dhe nuk ka një datë për të. Gjykimi i shpejtë dhe i arsyeshëm është pjesë e drejtësisë që të mos pengohemi në rrugën tonë për ta kërkuar në drejtësinë evropiane.
Prej një muaj përpara jush është ankimi i refuzimit të Drejtorisë së Burgjeve për të dhënë leje për betim, vetë natyra e çështjes që paraqitet përpara jush është e një rëndësie të veçantë pasi ka të bëjë me sovranitetin e popullit.
Për të gjitha sa thamë më sipër, na lindin natyrshëm pyetjet:
1-A do të lejohen zgjedhjet e lira në Himarë?
2-A do të zbatohet neni 45 i Kushtetutës?
3-A do të ketë vlerë neni 4 i Kushtetutës së Republikës së Shqipërisë?
4-A janë të drejtat kushtetuese të zbatueshme edhe për Bashkinë e Himarës dhe himariotët?
Këto pyetje kanë nevojë për përgjigje, dhe përgjigja e vetme është një datë e shpejtë për gjykim pasi bashkia po qeveriset prej humbëse gjë që po gërryen dhe shkatërron besimin te shteti demokratik të himariotëve.
Kujtojmë se Fredi Beleri është arrestuar 2 ditë para zgjedhjeve të 14 Majit, i akuzuar për blerje votash.
Edhe pse në qeli, ai arriti të fitojë zgjedhjet përballë rivalit të PS, Jorgo Goro.
Por pavarësisht kërkesave të tij në shkallë të ndryshme të gjyqësorit, ai nuk është lejuar të betohet si kryebashkiak.
Discussion about this post