Një ditë pasi disa nga informacionet sekrete të Policisë së Shtetit u përhapën me shpejtësi pas publikimit të e-maileve të Gledis Nanos, ngjarja është bërë lajm dhe në mediat e huaja, ku Reuters shkruan pikërisht për dosjen ku flitet për atentatin ndaj kryeministrit të Kosovës Albin Kurti.
Reuters i referohet njoftimit të qeverisë së Kosovës ditën e hënë ku u konfirmua se ishte prishur një komplot për të vrarë kryeministrin Albin Kurti në vitin 2021, duke konfirmuar pjesërisht një raportim të bërë nga mediat shqiptare në lidhje me publikimin e disa dosjeve sekrete nga hakerat iranianë.
Në një deklaratë për gazetarët për komplotin e raportuar, qeveria tha se agjencia e inteligjencës e Kosovës e kishte informuar Kurtin në atë kohë.
“Kryeministri Albin Kurti është njoftuar për këtë çështje (në vitin 2021) nga Agjencia Kosovare e Inteligjencës dhe institucionet e sigurisë kanë marrë të gjitha masat për të parandaluar këtë veprim”, thuhet në komunikatë.
Dokumente sekretë nga Policia e Shtetit kanë ‘rrjedhur’ pas sulmit të kryer nga hakerat iranianë dhe kanë zbuluar disa atentate të planifikuara ndaj zyrtarë shqiptarë e të Kosovës. Dokumentet kanë zbuluar se është tentuar vrasja e disa personave, mes tyre ish-kryedemokrati Lulzim Basha dhe kryeministri i Kosovës, Albin Kurti.
Discussion about this post