Autoritetet kolumbiane kanë në fokusin e tyre shkatërrimin e bandës Clan del Golfo, organizatë e cila shtrihet në 28 vende të ndryshme të botës, raporton Reuters.
Ky objektiv vjen pas kapjes së Dario Antonio Usuga, i njohur ndryshe si “Otoniel”, i cili cilësohet si i bosi i drogës më i kërkuar në vend . Arrestimi i tij u bë në rajonin verior të xhunglës Uraba, arrestim i cili nga presidenti kolumbian, Ivan Duque u konsiderua si goditja më e rëndë e fundit ndaj trafikut të drogës.
Ish-organizata e Usugas ka aleanca me pesë kartele ndërkombëtare dhe grupe mafioze për të shpërndarë 20 tonë kokainë në muaj, u tha gazetarëve gjenerali, Jorge Luis Vargas, drejtori i policisë kombëtare.
Usuga po pastronte paratë e Klanit me njerëz të biznesit me origjinë libaneze, arabe dhe izraelite, tha Vargas, pa dhënë detaje.
Krahas rrugëve të rregullta drejt Shteteve të Bashkuara përmes Amerikës Qendrore, Klani dërgon lëndën narkotike në Belgjikë, Spanjë, Holandë, Gjermani, Francë, Irlandë, Britani, Itali, Shqipëri dhe Ukrainë. Grupi ka lidhje deri në Iran, Kinë, Australi dhe Emiratet e Bashkuara Arabe, tha Vargas.
Qeveria ka thënë se ekstradimi i Otoniel në Shtetet e Bashkuara për akuzat e trafikut të drogës është një përparësi, por Vargas nuk dha një datë për procedurën.
Discussion about this post