Sot mbahet protesta e 126-të qytetare në Tiranë, në vijim të tubimeve të përditshme kundër qeverisë dhe kryeministrit Edi Rama. Pas më shumë se katër muajsh protestash të pandërprera, qytetarët dhe aktivistët rikthehen sërish në shesh, duke paralajmëruar vijimin e qëndresës dhe përsëritjen e kërkesave të tyre politike.
Protesta e radhës vjen një ditë pas tubimit të 125-të, ku qytetarët u mblodhën në shehsin “Skënderbej” dhe më pas marshuan në rrugët e kryeqytetit. Gjatë protestës së djeshme u dëgjuan thirrje kundër qeverisë dhe kryeministrit, ndërsa pjesëmarrësit përsëritën kërkesën për dorëheqjen e Ramës dhe ndryshimin e drejtimit politik të vendit. Në fund të tubimit u bë thirrja për pjesëmarrje më të madhe në ditët në vijim.
Në protestën e 125-të nuk munguan as deklaratat dhe akuzat e forta ndaj zyrtarëve të qeverisë. Një prej protestueseve kërkoi arrestimin e Belinda Ballukut, ndërsa deklaratat e saj u shoqëruan me akuza për korrupsion ndaj qeverisë.
Ndërkohë, po sot, në orën 16:00, pritet të zhvillohet një protestë edhe para godinës së Komisionit Evropian në Bruksel. Shqiptarë të diasporës, nga vende të ndryshme të Evropës, do të protestojnë përpara institucionit evropian, për të përcjellë siç thonë ata, që populli shqiptar duhet të hyjë në BE pa Edi Ramën.
“Shqiptarët e diasporës nga të gjitha qytetet evropiane, do të mblidhen në Bruksel përpara Komisionit Evropian, sepse institucionet e BE-së meritojnë të dëgjojnë edhe një version tjetër, përveç atij të Edi Ramës dhe Ursual Von der Leyen.
Ne jemi këtu, dhe shqiptarët e diasporës do të jenë në Bruksel për të thënë se shoqëria shqiptare meriton të futet në BE, por qeveria jo. Prandaj edhe ne nga Tirana sot nisim një thirrje që do të bëjë jehonë edhe në Bruksel: Shqipëria në BE, pa Edi Ramën.”, theksoi aktivistja Sidorela Vatnikaj një ditë më parë.
Protestuesit kanë përsëritur prej javësh se kërkesa kryesore mbetet largimi i Edi Ramës nga detyra.
Edhe gjatë tubimit të djeshëm, pas përfundimit të fjalimeve përpara Kryeministrisë, protestuesit vijuan marshimin në rrugët e Tiranës.
Discussion about this post