Duket se tashmë, Bayerni i Mynihut, ka vendosur përfundimisht përsa i përket fateve të Sadio Mane dhe Joao Cancelo.
Zv. kapiteni i Senegalit kaloi vetëm një sezon në “Allianz Arena” pas transferimit të bujshëm nga Liverpooli, ndërsa Cancelo u huazua nga Manchester City në janar, me një klauzolë blerjeje prej 70 milionë euro.
Por trajneri gjerman Thomas Tuchel dëshiron ta rindërtojë skuadrën e Bayernt nga themeli dhe është gati të heqë dorë nga Mane dhe Cancelo.
Sipas ‘Sky Sports DE’, Sadio Mane dhe Joao Cancelo nuk janë në planet e tij për sezonin e ardhshëm dhe fati i tyre në “Allianz Arena” tashmë është vendosur.
Bayern ka opsionin për të transferuar përgjithmonë Joao Cancelo nga Manchester City, por bavarezët nuk janë të gatshëm të paguajnë 70 milionë euro në këmbim të lojtarit portugez.
Mirëpo, befasues është vendimi i kampionëve të Bundesligës në rastin e ish-yllit të Liverpoolit, Sadio Mane, i cili mund të largohet nga Gjermania pas vetëm një sezoni, edhe pse ka shënuar 12 gola.
Sadio nuk ka qenë në gjendje të bindë Thomas Tuchel se ai e meriton të fillojë si titullar te Bayern dhe gazetari i njohur i “Sky Sports”, Florian Plattenberg beson se rikthimi në Premier League është opsioni më realist për Mane këtë verë.
Një tjetër episod që çoi në shkëputje mes Sadio Mane dhe drejtuesve të Bayernit ishte ai i konfliktit me gjermanin Leroy Sane, me pasojë pezullimin e afrikanit, i cili mori edhe një gjobë rekord nga bavarezët.
Discussion about this post