Në një vit të vështirë, të karakterizuar nga dorëheqja (e më pas, arrestimi) i presidentit të klubit, Safet Gjici, Kukësi është gati që të nisë një sezon të ri, në Kategorinë Superiore.
Ky do të jetë sezoni i 11-të radhazi, në elitën e futbollit kombëtar, për klubin verilindor, megjithatë, performanca, në krahasim me vitet e para në elitë, ka rënë, me klubin që prej tre sezonesh, nuk merr pjesë në kupat europiane.
Mirëpo, tani mendja është te e ardhmja, me klubin që ka bërë disa ndryshime, për shkak të largimeve të shumta të muajve të fundit. Ndryshimi më i fundit ka lidhje, me rolin e liderit të ekipit, atij që do tentojë që të dërgojë Kukësin drejt suksesit në Superiore.
Portieri Angelo Tafas po bëhet gati të nisë sezonin e tij të katërt te Kukësi, gjithnjë si protagonist, duke qenë numri 1 i katërkëndorit blu. Mirëpo, duket se ky sezon është paksa më i veçantë për të, sepse është graduar si kapiten i saj.
Me fanellën e Kukësit, portieri numëron plot 78 ndeshje, më shumë nga të gjithë lojtarët aktualë. Dje, në një prononcim ekskluziv për “Panorama Sport”, ai pohoi se si kapiten tani ka një shtysë më shumë, edhe pse lider nuk të bën thjesht një shirit në krah.
“Të jesh kapiten i ekipit është diçka ndryshe, një shtysë për mirë do të thosha. Megjithatë, lider ose lojtar me personalitet nuk të bën thjesht fakti se mban shiritin e kapitenit”, u shpreh fillimisht 23-vjeçari, i cili njëkohësisht është edhe lojtari me vlerën më të lartë në treg te Kukësi.
Sipas faqes së specializuar për kartonët e lojtarëve, “transfermarkt”, Tafas ka një vlerësim prej 250 mijë eurosh.
Jo më kot para pak javësh ai mbrojti edhe ngjyrat e Gjilanit në Kupat e Europës, ku shkoi për huazim nga ekipi kuksian. Tafas ka qenë edhe pjesë e Kombëtares U-21 të Shqipërisë, ndërsa është formuar si portier në akademinë e AEK-ut të Athinës.
Tanimë si veteran te Kukësi, portieri flet edhe për kampionatin që po troket, ku skuadra vjen me shumë ndryshime dhe djem të rinj. Tafas beson se të gjithë bashkë si grup mund të bëjnë gjëra pozitive këtë sezon, duke i mëshuar dëshirës që kanë djemtë.
“Lojtarët e rinj kanë filluar të ambientohen shumë shpejt dhe deri më tani çdo gjë ka shkuar mirë. Është e vërtetë që janë shumë djem të rinj dhe pa eksperiencë, por kanë dëshirën të tregojnë secili veten e tyre.
Ndaj, këtë e shoh si diçka pozitive. Normalisht kampionati është shumë i gjatë, por unë dua të jem optimist. Kam besim se mund të bëjmë gjëra të mira bashkë si grup”, vijoi prononcimin e tij titullari i verilindorëve, që ka besim tek ekipi i ndërtuar këtë sezon, edhe pse pa emra të bujshëm.
Kalendari i ka rezervuar Kukësit një ndeshje në transfertë me Vllazninë, e cila do të luhet të shtunën në orën 20:00 në stadiumin “Loro Boriçi”.
Edhe pse në letër janë favoritë shkodranët, Tafas beson te forca e Kukësit dhe në fushë do të hyjnë për të marrë patjetër një rezultat pozitiv.
“Vllaznia është një ekip i mirë dhe me pretendime, që ka lojtarë cilësorë. Mirëpo, ne do të futemi në fushë për të dhënë maksimumin dhe të shpresojmë te një rezultat pozitiv”, mbylli prononcimin e tij kapiteni i ri i Kukësit, duke pretenduar që ta nisin me këmbën e mbarë kampionatin për sezonin 2023-2024. Kujtojmë që Tafas është nga titullarët e paktë që nuk e braktisën ekipin verilindor./PanoramaSport
Discussion about this post