Nga Artan Fuga
Shitësi i byreqeve më pa me pak ndrojtje dhe më tha: Profesor, çmimin e byrekut nuk e kam ngrit, por të dhallës nuk kam çfarë bëj sepse e kanë ngritur tregtarët!
Ngrije more edhe të byrekut po deshe! – thashë, dhe ai më pa me dyshim!
Isha i sinqertë! Kur konkurrenca është e lirë, si te byrektoret, çmimi gjithmonë është i drejtë. Sidomos kur tregtohen mallra konsumi për popullsinë me pak të ardhura! Ai i shkreti e di sa lekë kanë klientët e tij prandaj punon me çmime të ulëta, ose falimenton!
Unë i dua ata sepse konkurrojnë restorantet që, atje te tangërlliku, të japin të hashë pecetën sikur janë duke të dhënë të hash peshkun e artë!
Ik o lipsu!
Kurse te tregtarët e vegjël, byrektoret, etj., kurrë nuk ka rrezik për padrejtësi sepse ata punojnë me marzhe minimale fitimesh!
I lashë dyqind lekë të vjetra një shitëseje ambulante te pazari fshatar i Durrësit! Menjëherë reagoi dhe më dha një limon më shumë.
Çfarë bën moj? – i thashë!
Më nderove, edhe unë të nderova, – tha!
O Zot, ky është populli im – thashë me vete!
Këtë do të kisha propozuar për presidente!
Unë konsumoj te ofruesit e shërbimeve ose produkteve me të ardhura më të pakta, nëse nuk ka rrezik të madh cilësia, si formë rezistence qytetare ndaj padrejtësive të një tregu piramidal si pushteti!
Discussion about this post