Përçarja e demokrateve solli edhe këtë herë një rezultat zhgënjyes për opozitën.
PD e Enkelejd Alibeajt nuk mori asnjë bashki dhe një rezultat qesharak në rang kombëtar. Ndërsa koalicioni “Bashkë Fitojmë” i drejtuar Berisha arriti të fitonte vetëm në 6. Bëhet fjalë për Bashki të vogla si Hasi, Fushë-Arrëzi, Puka, Mirdita, Memaliaj dhe Himara.
Megjithatë, humbi Shkodrën.
Përçarja e opozitës solli një sërë faktorësh që e dëmtuan nga pikëpamja elektorale, si perceptimi që krijoi te votuesi gri, fryma e formësuar te vetë demokratët që shihnin si kundërshtar njeri-tjetrin, harxhimi i energjive dhe kohës së konsiderueshme në betejën e brendshme, etj.
Megjithatë nëse për një krahasim naiv përjashtojmë gjithë këtë faktorë dhe marrim si reference rezultatet e këtyre zgjedhjeve, në një bashkim hipotetik votash mes opozitës, do të kishte 3 bashki më shumë.
Fjala është për Kuçovën, Mallakastrën dhe Finiqin.
Në Kuçovë, kandidati i “Bashkë Fitojmë” mori 682 vota më pak se sa kandidati i PS-së. Nga ana tjetër, kandidati i PD-së Alibeajt mori 739 vota.
Nëse do të kishte një bashkim votash mes opozitës, “Bashkë Fitojmë” dhe PD-së së Alibeajt, atëherë PS do të humbiste Kuçovën. Një rezultat që nuk do të hiqte aspak zhgënjimin për rezultatin total për të djathtën, gjithsesi një rezultat historik për këtë bashki që historikisht është parë si bastion i së majtës.
E njëjta situatë në Mallakastër. Diferenca 290 vota do të përkthehej nga humbja në trimuf për dy PD-të, që të bashkuara do të kishin dy bashki më shumë.
Finiqi është bashkia e tretë. Me 1344 vota diferencë do të kishte fituar opozita e bashkuar. Në vend të kësaj, humbi dhe aty.
Discussion about this post