Rezultoi me doping, lojtari i Chelsea shprehet i shokuar: S’kam bërë asgjë të gabuar

Chelsea ka konfirmuar se mesfushori sulmues, Mykhailo Mudryk, ka dështuar në një test droge, pasi në mostrën e urinës së tij është konstatuar prania e një substance të ndaluar.

Klubi londinez ka thënë se do të punojë me autoritetet përkatëse për të përcaktuar hapat e ardhshëm për lojtarin, i cili u transferua në Stamford Bridge në janar 2023.

Në një deklaratë në faqen e saj të internetit, Chelsea tha se lojtari ndërkombëtar ukrainas nuk kishte marrë qëllimisht asnjë substancë të ndaluar.

“Si klubi ashtu edhe Mykhailo mbështesin plotësisht programin e testimit të FA dhe të gjithë lojtarët tanë, përfshirë Mykhailo, testohet rregullisht. Mykhailo ka konfirmuar kategorikisht se ai kurrë nuk ka përdorur me vetëdije ndonjë substancë të ndaluar. Të dy, Mykhailo dhe klubi, tani do të bashkëpunojnë me autoritetet përkatëse për të përcaktuar çfarë ka shkaktuar këtë rezultat. Klubi nuk do të bëjë komente të tjera.”

Mudryk publikoi një deklaratë të tijën në Instagram, duke thënë: “Ky ka qenë një shok i plotë, pasi kurrë nuk kam përdorur me vetëdije asnjë substancë të ndaluar apo kam shkelur ndonjë rregull dhe po punoj ngushtësisht me ekipin tim për të hetuar se si mund të ketë ndodhur kjo.

Unë e di që nuk kam bërë asgjë të gabuar dhe mbetem me shpresë që do të kthehem në fushë së shpejti. Nuk mund të them më shumë tani për shkak të konfidencialitetit të procesit, por do të flas sapo të mundem.”

23-vjeçari nuk ka luajtur për klubin që nga 28 nëntori. Ai ishte pjesë e skuadrës për fitoren e së dielës kundër Aston Villa, por nuk luajti. Trajneri i Chelsea-t, Enzo Maresca, e ka justifikuar mungesën e tij me një sëmundje.

Një lojtar që dështon në testin e drogës mund të dënohet me deri në katër vjet pezullim dhe kjo do të shihet si një tjetër goditje për Mudryk, i cili ka pasur vështirësi që kur erdhi në Premier League.

Ai kërkohej edhe nga Arsenali, por përfundimisht u transferua te Chelsea për 89 milionë paundë në janar 2023. Ai numëron 15 paraqitje për Chelsea-n deri tani këtë sezon, duke shënuar tre gola.