“Ariana Afghan Airlines” ka rifilluar fluturimet midis Kabulit dhe tre qyteteve të mëdha provinciale pasi një ekip teknik nga Katari rihapi aeroportin e kryeqytetit për të marrë ndihma.
Fluturimet midis Kabulit dhe qytetit të Heratit në perëndim, Mazar-i-Sharif në veri dhe Kandahar në jug janë rifilluar, tha linja ajrore në një deklaratë në faqen e saj në Facebook.
“Ariana Afghan Airlines është krenar që ka rifilluar fluturimet brenda vendit”, thuhet në kumtesën e publikuar në Facebook.
Ky aeroport kishte qenë i mbyllur për disa ditë, pasi që forcat amerikane braktisën vendin dhe i dhanë fund evakuimit të dhjetëra mijëra njerëzve.
Megjithatë në Afganistan kanë mbetur edhe disa mijëra që nuk kanë arritur të largohen, e tani po frikësohen se mund ta pësojnë me jetë nga talebanët, për faktin se cilësohen si bashkëpunëtorë të perëndimit.
