Rikthimi i debatit për rihapjen e lojërave të fatit, por këtë herë sipas qeverisë vetëm online, ka bërë që kryeministri Edi Rama t’u përgjigjet skeptikëve dhe “furisë se kjo po bëhet për Olsi Ramën”.
Kreu i qeverisë theksoi se lejimi i basteve online do të thotë marrje e këtij aktiviteti nga duart e ekonomisë së zezë. Kjo dhe për arsyen që paratë të shkojnë te shteti dhe më pas të kthehen për federatat që kanë nevojë për investime.
“Nuk flasim për lojërat e fatit në tërësi. Debati kur u mbyllën lojërat pati një moment diskutimi se ne ishim që atëherë skeptik për pjesën e basteve online që mund ta realizonim. Po ju kujtohet që atëherë u ngrit një furi e madhe që kjo po bëhet për Olsi Ramën, se kjo po bëhet për nuk di unë se kë, e për të mos hedhur në erë një proces e një iniciativë e vendim shumë të rëndësishëm që ka mbrojtur shumë njerëz që përndryshe do ishin viktima të këtij aktiviteti çmendurak lojërash fati ne i përfshijmë e bastet online sportive, nuk flasim për salla, ishin e do mbeten të ndaluara. Tani ne nuk flasim për hapje, por për marrjen e këtij aktiviteti nga duart e ekonomisë së zezë dhe nxjerrjen e këtyre përfitimeve në dritë. As Kina nuk arrin dot ta bllokojë dhe pse e ka të ndaluar. Ajo që vlen këtu është reflektimi si mund ta ndihmojmë sportin më shumë se dhe ne jemi në pozitë, realisht nuk është çështje dëshire, unë dhe për arsye të background dhe lidhjeve emocionale që kam me shumëkënd këtu dhe bindjes se sporti e kultura janë të pazëvendësueshme dhe për ekonominë se ndikojnë drejtpërdrejtë është e pamundur që ne ti përgjigjemi kërkesave tuaja që janë modeste”, tha Rama.
Discussion about this post