Mëngjesi i kësaj të enjteje e ka gjetur juglindjen e vendit nën reshje dëbore, me intensitet nga i ulët në mesatar.
Reshjet janë të pranishme në të gjitha bashkitë e qarkut Korçë, ndërsa intensiteti më i lartë raportohet në Dardhë, Voskopojë, Ersekë dhe në Qafë Thanë.
Sipas raportimeve, aktualisht, në Qafë Thanë po punohet me disa mjete borëpastruese për kriposjen e rrugëve, ndërsa e njëjta situatë po zhvillohet edhe në zonat e tjera të Korçës.
Ndërkohë si pasojë e reshjeve të shiut gjatë natës, raportohet se në zonën e njohur si Gropat e Gëlqeres, rreth 5 kilometra nga Erseka në aksin Ersekë–Leskovik, është konstatuar rrëshqitje e pjesshme e rrugës. Ndërkohë, Hidrovori i Tushemishtit vijon punën me tre pompa, pasi njëra është jashtë funksionit. Niveli i ujit mbetet i lartë.
Situatë më problematike paraqitet në Bashkinë Maliq, ku lumi Devoll ka dalë nga shtrati në disa pika të argjinaturës në zonën e Sheqerasit. Në Dunavec niveli i ujit është në maksimum, por pa dalje nga shtrati. Aksi Maliq–Lozhan, në zonën e Senishtit, ka qenë i bllokuar gjatë natës, por është pastruar; megjithatë, mbetet problematik për shkak të batisjeve dhe rrezikut për trupin e rrugës.
Rrëshqitje dherash raportohen edhe në Mesmal, me bllokim të rrugës, ndërsa në Lozhan të Lartë ka rënie gurësh.
Ndërkohë reshje dëbore ka edhe në Pogradec, ku sipas raportimeve trashësia e dëborës ka arritur në 5cm. Ndërkohë në Dardhë raportohet për mungesë energjie elektrike.
Discussion about this post