Thuajse i gjithë vendi është përfshirë nga reshje shiu dhe temperaturat e ulëta. Në Gjirokastër u shfaqën problematikat e para. Shiu dhe temperaturat e ulëta kanë përfshirë vendin pas disa ditëve diell në mes të Dimrit. Në Gjirokastër, reshjet intensive të nisura prej mbrëmjes së të premtes kanë sjelle problematikat e para.
Përroi i Sopotit ka dalë nga shtrati dhe ka bllokuar lëvizjen e mjeteve drejt lagjes ‘Lenxat’ ku banojnë rreth 80 familje. Siç tregojnë pamjet, prurjet e shtuara të përroit kanë shkaktuar erozion duke rrezikuar muret rrethuese të disa banesave përgjatë tij.
Kjo situatë në Lazarat përsëritet sa herë që ka reshje shiu. Autoritetet lokale në Gjirokastër mjaftohen vetëm me ndërhyrje provizore për hapjen e rrugës dhe jo zgjidhje përfundimtare të problematikës.
Vështirësi pati edhe në disa rrugë të qytetit. Reshjet ndërkohë vijojnë duke shtuar rrezikun e përmbytjeve dhe rrëshqitjeve të dherave në orët në vijim. Qendra e fuqishme ciklonare në qendër të rajonit të Mesdheut do të diktojë kushtet e motit edhe për ditët në vijim.
Veç reshjeve të shiut, nuk përjashtohet as rikthimi I reshjeve të dëborës në zonat malor. Era fryn mesatare dhe e fortë me shpejtësi 55 km/h Jugor duke gjeneruar ne brigjet detare dallgëzim 5 ballë.
Discussion about this post