Këtë të dielë Partizani do të përballet në transfertë me Kastriotin për javën e tetë të Superligës. Kjo ndeshje do të zhvillohet në stadiumin e Kamzës në orën 13:45 dhe tashmë ‘Të Kuqtë’ e kryeqytetit do të kenë sërish në krye të stolit trajner Ilir Daja, pezullimi i të cilit mbaroi.
Duke folur në prag të kësaj sfide tekniku theksoi se i gjithë problemi i rezultateve jo të mira te Partizani është gjendja emocionale e lojtarëve të rinj.
“Është e vështirë të drejtosh skuadrën nga pankina pasi jam mësuar gjithmonë në stol. Nga pankina nuk e përcjell siç duhet mesazhin për lojtarët dhe për këtë arsye vendi i trajnerit është në stol. Kemi një krizë rezultatesh pasi Partizani nuk është mësuar të mos fitojë në kaq ndeshje. Kemi pasur shumë raste për të fituar, por kemi gabuar duke e filluar lojën në disavantazh dhe kjo e bën të vështirë. Kemi lojtarë me eksperiencë, por edhe lojtarë të rinj në formacionin bazë dhe duke parë presionin rritet doza emocionale e tyre”.-u shpreh ai.
Më tej ka shtuar se fitorja është kërkuar vazhdimisht, duke theksuar se lojtarët duhet të luajnë me mendje të ftohtë, pra të mos jenë të ndarkuar nga ana mendore.
“Kthesën e kemi pritur javë pas jave dhe kjo javë është shumë e rëndësishme e ne kërkojmë të shkojmë te fitorja. Fitorja duhet të jetë në bazë të logjikës dhe mendja duhet të jetë akull dhe zemra flakë siç i thonë një fjale të urtë popullore”,-tha Daja.
I pyetur për marrëdhëniet me drejtuesit tekniku u shpreh se duhet bërë më e mira për Partizanin dhe jo për të apo për lojtarët.
“Në media është përmendur që kam probleme me drejtuesit. Kam një marrëdhënie të shkëlqyer dhe secili bën punën e vetë. Kam folur me drejtuesit për zgjidhjen emergjente të situatës dhe nuk i shmangem përgjegjësisë. Ne do të bëjmë maksimumin që të bëhet më e mira për Partizanin dhe jo për trajneri Daja apo për lojtarët”.-shtoi tekniku.
Partizani në këtë sfidë do të jetë me mungesa, pasi jo vetëm Kardozo, Daja ka bërë me dije se edhe Cara nuk do jetë i gatshëm për ndeshjen me Kastriotin.
“Prej javësh kemi mungesa. Kardozo e ka mbyllur këtë gjysmën e parë të sezonit, Cara është stërvitur veçmas. Kjo gjë nuk e justifikon rezultatin nesër pasi kemi një kontigjent të plot për të luajtur. Vështirësia ndaj Kastriotit është e madhe dhe nëse nuk japim maksimumin nuk do të shkojmë dot te fitorja”, -deklaroi ndër të tjera trajneri i skuadrës së Partizanit./K.T/Gijotina.com
Discussion about this post