Çështja e kufirit detar me Greqinë, është rikthyer në tryezën e diskutimeve me Tiranën zyrtare. Ka qenë vetë kryeministri i Greqisë i cili ka hapur diskutimin për demarkacionin detar me kryeministrin Edi Rama gjatë takimit të tyre të Konferencën e Sigurisë në Mynih të Gjermanisë, ditën e sotme.
Në takimin mes kryeministrit Edi Rama dhe homologut të tij grek, teksa kanë diskutuar mbi caktimin e hapësirës detare midis dy vendeve, mësohet se ata kanë përforcuar qëndrimin e të dyja vendeve për ta dërguar këtë çështje në Gjykatën Ndërkombëtare të Drejtësisë në Hagë.
Mediat greke shkruajnë që ky përforcim i qëndrimit të dy kryeministrave vjen pas dakordësisë së gjetur midis të dyja palëve vitin e kaluar. Sipas dy kryeministrave, ky hap do të konsolidojë më tej marrëdhëniet midis dy vendeve si dhe do të rrisë sigurinë dhe bashkëpunimin në rajon. Gjithashtu, Kryeministri grek ka nënvizuar mbështetjen e vendosur të Greqisë në kursin evropian të Shqipërisë, në përputhje me termat dhe kushtet e procesit të anëtarësimit.
Discussion about this post