Të premten në mbrëmje në orën 19:45 do të fillojë sezoni 2021-2022 i Kategorisë Superiore në vendin tonë.
Ndeshja që do të çelë siparin është supersfida midis Teutës dhe Partizanit, e cila do të zhvillohet në ‘Elbasan Arena’ për shkak të punimeve që po bëhen në ‘Niko Dovana’.
Java e parë do të zhvillohet në tre ditë, ku data 10 sjellë vetëm takimin midis ‘Djemve të Detit’ dhe ‘Të kuqve’ të kryeqytetit, të cilët njihen për rivalitetin e hershëm midis tyre.
Më pas të shtunën, më 11 shtator, do zhvillohen dy takime të tjera. Tirana do presë Skënderbeun në stadiumin ‘Selman Stërmasi’, në takimin që do startojë në mesditë në orën 13:45.
Po në të njëjtin orar Laçi do të presë Vllazninë, në takimin që shkodranët do tentojnë të thyejnë tersin e 7 viteve dhe do përpiqen të rikthejnë fitoren e munguar në kaq shumë vite.
E diela e 12 shtatorit ka rezervuar dy takimet e fundit të javës së parë të Superligës. Këto do të jenë edhe ndeshjet e debutimeve të skuadrave të ngjitura në elitën e futbollit shqiptar Egnatias dhe Dinamos.
Klubi i Rrogozhinës do të presin në shtëpi në orën 13:45 Kukësin në një ndeshje e cila pritet të jetë goxha sfiduese për vendasit, pasi verilindorët njihen për lojën e ashpër.
Ndërkohë Dinamo do të luajë takimin e parë në Superligë pas 9 vitesh me skuadrën e Kastriotit. ‘Blutë’ e kryeqytetit do të udhëtojnë në drejtim të Krujës, për të nisur përballjen me vendasit në orën 13:45.
Dinamo do të përpiqet të tregojë forcën dhe me afrimet e reja do mund të shihen deri diku edhe kapacitetet e 18 kampionëve të Superligës, teksa dihet që bëri një merkato goxha të madhe gjatë kësaj vere.
Ndërkohë theksojmë se për herë të parë në kampionatin shqiptar do të përdoret edhe sistemi i VAR./Gijotina.com
