Në kulmin e krizës së rritjes së çmimit të karburanteve, qeveria shqiptare ka lëshuar një tender të majmë për Shefqet Kastratin, duke i dhënë jo pak, por 6.5 milionë euro nga fondet publike. Autoriteti prokurorues për këtë tender të majmë, i cili mësohet se është fituar në vlerën e fondit limit nga Kastrati ka qenë Ministria e Bujqësisë me objekt “Blerje karburant për skemën e rimbursimit të fermerëve”. Ky tender u shpall në 14 shkurt 2022 si pjesë e skemës për rimbursimin e fermerëve, ndërkohë që shpallja e fituesit u publikua më 16 mars 2022.
Në garë nuk kishte asnjë kompani tjetër pjesëmarrëse përveç bashkimit të operatorëve “KASTRATI” SHPK & “KASTRATI GROUP” SH.A të cilët u shpallën automatikisht fitues. Kjo nuk është hera e parë që pronari i këtyre kompanive fiton tenderë pa garëm, të cilët renditen me flamur të kuq për sjellje të mundshme klienteliste sipas “openprocurement.al”.
Kujtojmë se Shefqet Kastrati është akuzuar shpesh nga Partia Demokratike dhe ish-kryetari i saj Lulzim Basha si një nga oligarkët kryesorë të qeverisë Rama. Megjithatë kjo nuk e ka ndërgjegjësuar qeverinë për të organizuar një tender konkurrues i cili ul ofertën fituese sepse ofertë më e ulët do të thotë më shumë fonde publike në interes të komunitetit.
Në tender përcaktohet fitimi 18,4 lekë/litër i pandryshuar gjatë gjithë kohës së zbatimit të kontratës) pa TVSH ndërsa çmimi total është 175,728 leke/litër pa TVSH për 12 muaj nga firmosja e kontratës.
Skema e rimbursimit të fermerëve u aplikua për herë të parë vitin e kaluar nga qeveria shqiptare, duke shpërndarë 4.1 milionë litra naftë, apo rreth 210 litra për fermer. Shpërndarja e sasisë së naftës, do të bëhet edhe këtë vit me anë të kartave elektronike që do të pajisen përfituesit, në pikat më të afërta të karburantit.
Megjithatë, mbetet e dyshimtë sesi ky tender me një vlerë kaq të lartë monetare është realizuar pikërisht në kohën e rritjes së frikshme të çmimeve të karburantit në vendin tonë, rritje e cila u shoqërua me protesta të forta qytetare. Madje, pas këtyre protestave, qeveria ngriti një bord për kontrollimin e çmimeve, por edhe ky bord duket se e “ka lëshuar dorën” pas shuarjes së tubimeve paqësore të qytetarëve.
Madje, rritja e frikshme e çmimeve, nga të cilat po përfitojnë dhe bizneset e mëdha të karburantit, siç është në këtë rast Kastrati, shton dhe më shumë dyshimet se shpërdorimi i fondeve për rimbursimin e fermerëve po kryhet me vetëdije të plotë nga qeveria shqiptare.
Discussion about this post