Pak pasi Gjykata e Apelit vendosi rikthimin e çështjes së Vulës së PD-së në Shkallën e Parë, duke njohur si kryetar të saj Enkelejd Alibeajn, mësohet se ky i fundit nuk humbet kohë për t’u rikthyer në selinë e PD-së.
Burime nga selia blu bëjnë me dije se Enkelejd Alibeaj pritet të thërrasë mbledhje të Kryesisë së Partisë Demokratike për të diskutuar për hapat që do të ndjekë Partia Demokratike që ai përfaqëson.
Nga burime brenda kampit të Alibeajt, pritet që në orët në vijim Alibeaj në këtë mbledhje të shpalosë një platformë të qartë për bashkimin e demokratëve dhe bashkëpunimin për zgjedhjet e 14 prillit.
Por ajo që është ende e paqartë është mënyra se si është menduar bashkëpunimi dhe kushtet për këtë me demokratët e udhëhequr nga Sali Berisha.
Grupi i Alibeajt ka iniciuar edhe pak muaj më parë një platformë bashkëpunimi për 14 majin, ku negociuan Gazmend Bardhi dhe Edi Paloka, por pa mundur ta mbyllnin me sukses këtë proces.
Discussion about this post