Presidenti turk Recep Tayyip Erdogan bëri me dije gjatë takimit me kryeparlamentaren Lindita Nikolla, në pallatin presidencial në Turqi, se do të vizitojë shumë shpejt Kurbinin. Shkak i kësaj vizite do të jetë shpërndarja e shtëpive për familjet e dëmtuara nga tërmeti i 26 nëntorit, të cilat pritet të shpërndahen në janar të vitit të ardhshëm.
Nga ana tjetër kryetarja e Kuvendit të Shqipërisë, Lindita Nikolla i shprehu mirënjohje presidentit turk për ndihmën e dhënë dhe solidarizimin me popullin shqiptar.
“Ju falenderojmë për rolin e Turqisë si lobuese e fuqishme në njohjen e Kosovës në arenën ndërkombëtare, zërin e fuqishëm të Turqisë në NATO për institucionalizimin e marrëdhënieve me Kosovën, dhe do të dëshironim angazhimin e Turqisë edhe në ndalimin e fushatës së Serbisë për tërheqjen e njohjes së Kosovës nga disa shtete”, citon zyra e shtypit fjalën e Lindita Nikollës.
Erdogan premtoi se do të ndërtojë 500 shtëpi në Shqipëri, për të strehuar familjet e mbetura pa banesë nga tërmeti i fuqishëm i 26 Nëntorit.
“Në Shqipëri ka pasur një tërmet. Ministria jonë e Mjedisit dhe Urbanizimit do të punojë për krijimin e terrenit të përshtatshëm për t’u ndërtuar 500 shtëpi vëllezërve shqiptarë. Kjo është përgjegjësi e qytetërimit tonë. Vëllezërit turq do të ndërtojnë 500 shtëpi për vëllezërit e tyre shqiptarë. A ka ndonjë dallim? Asnjë. Kemi lidhje vëllazërie. Nuk duhet të presim askënd. Ne do t’i ndërtojmë vetë shtëpitë, sa më shpejtë të jetë e mundur, që ata të kalojnë dimrin aty”, ka thënë Erdogan.
Discussion about this post