Gjykata e Shkallës së Parë Administrative ka vendosur në favor të banorëve të Kombinatit, të cilët pas protestave të shumta vendosën që të adresojnë problemin e tyre në rrugë gjyqësore. Pallati 146 në Kombinat me vendim të Këshillit Bashkiak Tiranë do të shembej, por ky vendim u shfuqizua. Pasi sigurimit te padisë Gjykata Administrative e Shkalles së Parë Tiranë vendosi shfuqizimin e vendimit nr. 107, datë 28.09.2020 të Këshillit Bashkiak “Për prishjen e detyruar të pallatit të tyre” si dhe shfuqizimin e vendimit të Institutit të Ndërtimit.
Banorët e konsiderojnë këtë si një çështje prone dhe jo politike, ndaj vendimi në favorin e tyre dëshmon paligjshmërinë e vendimeve të dala nga Këshilli Bashkiak i Tiranës.
“Gjykata ka pranuar të gjithë elementët për të cilët ne kemi kërkuar vendimin e Gjykatës. Kjo është çështje prone, nuk është çështje politike. Nuk ka të bëjë me të drejtën dhe me marrëdhëniet mes qeverisë dhe individit. Më e rëndësishme është që vendimin e Këshillit Bashkiak e ka nxjerrë të paligjshëm, kështu që implikimi që ka ky vendim nuk është thjesht që pengoi prishjen e pallatit 146, por me këtë mund të shihen të gjitha praktikat që kanë ndjekur Këshilli Bashkiak, Erion Veliaj në mënyrën se si kanë proceduar me pallatet e tjera”, shprehen banorët.
Sipas tyre shtëpitë nuk i kanë të dëmtuara, ndaj shembja e tyre nuk është e arsyeshme.
“Ata thanë do shemben, por ne nuk na është prishur asgjë. Pse të na i shembin?”
Ky është rasti i parë ku banorët zgjedhin rrugën gjyqësore për të kundërshtuar Këshillin Bashkiak lidhur me prishjen e banesave, por pritet që të pasohen dhe nga banorë të tjerë.
Discussion about this post