Ditën e sotme që përkon me dy vjetorin e tërmetit tragjik të 2019-ës, banorët e lagjies nr.7 në Durrës kanë zgjedhur të protestojnë. Banorët e një pallati janë shfaqur para Bashkisë së Durrësit, me kërkesën për rindërtimin e pallatit të tyre, i cili pretendojnë se është dëmtuar nga tërmeti. Ata shprehen se kanë kërkuar vazhdimisht nga Bashkia e Durrësit që të zgjidhë problematikën e tyre, por ende nuk kanë parë asnjë nismë konkrete.
“Qëllimi i kësaj proteste është për pallatin. Ka dy vjet që është prishur dhe akoma nuk kemi marrë një përgjigje se kur do të ndërtohet. Është e treta herë që dalim në protestë. Asnjë nga këta në bashki nuk kemi mundur të takojmë. Thonë do të futet në listë pallati juaj. Herën e fundit thanë do merret në shqyrtim. U bënë dy mbledhjet e bashkisë dhe pallati jonë nuk ishte,” shprehet një banore.
Problem për banorët e pallatit 837 në Durrës mbetet dhe bonusi i qerasë, pasi pretendojnë se iu vonohet dhënia e bonusit mujor.
“Halli jonë i të gjithëve, bëhet fjalë për pallatin 837. I kërkojmë kryeministrit të vërë dorën në zemër, të shikojë dosjen tonë dhe të procedohet sa më shpejt. Fondet nga jashtë kanë ardhur për ne. Kërkojmë të drejtën tonë legjitime. Rama duhet të na e kishte dhënë dhe jo të tallet me ne. Vonesat e tyre janë të pakuptimta. Përgjigjen nuk ka fonde shteti. Ku shkojnë këto fonde? Kemi probleme edhe me bonuset e qirasë”, shprehet ajo.
Kryeministri Rama kujtoi sot në rrjetin social facebook , tragjedinë që goditi shqiptarët më 26 nëntor 2019, teksa evidentoi procesin e rindërtimin, por ndërkohë qytetarët e Durrësit nuk duken aq entuziastë dhe të kënaqur me ecurinë e këtij procesi, i cili ka nisur prej dy vitesh.
Discussion about this post