Kreu i grupit parlamentar të PD, Alfred Rushaj ka zhvilluar një takim me banorët e shtëpive që po prishen tek lagja “5 Maji”. Janë mbi 1200 banorë të prekur nga prishjet në shkelje të ligjit, duke mos u respektuar as detyrimi minimal ligjor për dëgjesat publike.
Gjatë takimit me qytetarët, Rushaj u shpreh se qeveria po e politizon situatën pasi banorët janë votues të Partisë Demokratike.
“Shoh që ka dhe hakmarrje brenda, pasi kjo zonë ka votuar PD dhe gjejnë rast t’u bien banorëve. Disa menduar se do të zgjidhnin punë me votimet, por ju paralajmërova që po ju mashtrojnë, së kështu kanë bërë kudo. Një projekt i madh do të thotë se interesat janë të mëdha”, tha ai.
Banorët i bënë thirrje qytetarëve të tjerë të mos gënjehen apo të shpresojnë tek qeveria Rama. “Erion Veliaj dhe Edi Rama po fshihen. I zoti i shtëpisë që i fshihet familjes, ai është kot. Edi Rama është edhe kryeministër, kryeprokuror, kryegjykatës, kryepolic e dreqi e t’bir dhe sot jemi në rrugë të madhe. Jemi, sepse kemi pritur sa na ka ardhur litari neve në fyt”, thanë kryefamiljaret.
Ndër të tjera, Rushaj garantoi banorët për realizimin e kërkesës së tyre për përfshirjen e KLSH-së në nxjerrjen e parregullsive për projektin.
“Shumë gjëra falen, por prishja e shtëpisë, nxjerrja në rrugë të madhe me fëmijët, është shumë e rëndë. Pas familjes, shtëpia është gjëja më e shtrenjtë për njeriun. Do t’i bëj kërkesë menjëherë kryetarit të KLSH që shkeljet e gjetura t’ia verë sa më shpejt në dispozicion organeve të drejtësisë”, tha Rushaj.
Nisur nga tërmeti i 26 nëntorit, qeveria ka vendosur që kjo zonë të shndërrohet në një hapësirë eksperimantale dhe inovatore, ku do të strehohen jo vetëm familjet që humbën shtëpitë nga tërmeti.
Ekspertë të fushës së urbanistikës kanë ngritur shqetësimin se qeveria shqiptare po shfrytëzon aktet normative të miratuara në emergjencë për rindërtimin, për të zbatuar projekte të paracaktuara në planin urbanistik “Tirana 2030”.
Tirana, Kombinati dhe Paskuqani nuk kanë qenë pjesë e rindërtimit, por situata e tërmetit po shfrytëzohet në mënyrë të artë nga Rama e Veliaj. Shpronësimet që do bëheshin pa rënë tërmeti dhe problematika që do ishte në Kombinat, do ishte shumë e vështirë që ta implementonte këtë plan. Por tërmeti u dha të drejtën që edhe pallatet apo objekte të padëmtuara do shemben, për t’i lënë rrugën e lirë krimit të organizuar për pastrimin e parave.
