Dita e Rinisë, 31 vite pas guximtarëve me ëndrrën për të parë Shqipërinë të lirë e të pavarur, me sloganin që duket se nuk do i humbasë kurrë aktualiteti “E duam Shqipërinë si gjithë Europën”, e gjen Shqipërinë dukshëm shumë larg nga ëndrra e studentëve të 8 dhjetorit. Rinia që plaket dëshmon gjendjen aktuale të vendit tonë, gjë e cila pasqyrohet dhe nga të dhëna zyrtare. Sipas INSTAT mosha mesatare e popullsisë shqiptare është rritur duke çuar në plakjen e saj. Nga afërsisht 33 vjeç në 1 Janar 2011, në afërsisht 38 vjeç në 1 Janar 2021. Mosha mesatare e popullsisë është rritur gjithashtu sipas gjinisë: nga 31,3 vjeç për meshkujt dhe 33,9 vjeç për femrat në 2011, në 36,8 dhe 38,6 në 2021. Popullsia e Shqipërisë po plaket. Kjo tregohet nga përqindja që zënë njerëzit mbi 65 vjeç, krahasuar me të rinjtë (nën 15 vjeç) nga viti 2011 deri në 2021 (popullsia më 1 Janar).
Siç dallohet nga të dhënat rritja e moshës së popullsisë ka prekur disa herë më shumë gjininë mashkullore, kjo për shkak se meshkujt e rinj të vendit emigrojnë vazhdimisht në vende që ofrojnë mundësi më të mira se Shqipëria. Grup-mosha e popullsisë 65+ vjeç është rritur nga 11,0 % në vitin 2011 në 15,2 % në vitin 2021, ndërsa grup-mosha e popullsisë 0-14 vjeç ka rënë nga 21,6 % në vitin 2011 në 16,5 % në 2021.
Ndërsa përsa i përket përqendrimit të popullsisë të paktën 1/3 e shqiptarëve janë përqendruar në kryeqytet, duke sjellë braktisjen e qarqeve të vogla për shkak të nivelit të ulët ekonomik dhe papunësisë që vendet e tilla karakterizohen. Vetëm dy qarqe në vend shënuan rritje të popullsisë për periudhat 2020-2021, përkatësisht Tirana dhe Durrësi , teksa qarku i Gjirokastrës dhe ai i Kukësit mbartin përqindjen më të ulët të shtimit të popullsisë në vend.
Në vitin 2020, të rinjtë e moshës 15-29 vjeç të cilët nuk janë të punësuar dhe nuk janë duke ndjekur shkollën apo ndonjë formim profesional përbëjnë 27,9 % të të rinjve gjithsej, një përqindje e lartë që tregon se një pjesë e konsiderueshme e të rinjve nuk kanë mundësi punësimi dhe as nuk janë të kualifikuar.
Papunësia e lartë e të rinjve si dhe përqindja alarmuese e të rinjve jo të përfshirë në punësim, arsim, trajnim si dhe dëshira e të rinjve të arsimuar por të papunë, shoqërohet me dëshirën për braktisjen e vendit dhe pesimizmin se e ardhmja e tyre në Shqipëri mund të jetë siç ato e kanë projektuar. Këto shifra janë këmbanë alarmi e të ardhmes së Shqipërisë ku vitaliteti I kombit po largohet çdo ditë e më shumë.
Discussion about this post