Në gjykatën e Apelit të Posaçëm po mbahet seanca ndaj ish-ministrit të brendshëm Saimir Tahiri, me një trupë të re gjykuese, duke iu përgjigjur vendimit të Gjykatës së Lartë.
Mësohet se, prokuroria i qëndron akuzave që ka bërë edhe në shkallën e parë, duke kërkuar dënimin e Tahirit me 8 vite burg, ndërsa ish-ministri dhe avokati i tij mbrojtës Maks Haxhia janë shprehur se prokuroria nuk ka paraqitur asnjë provë të re, duke lexuar konkluzione që janë thënë edhe më herët.
“Prokuroria nuk ka paraqitur asnjë provë të re, ne i qëndrojmë mbrojtjes që kemi bërë në shkallën e parë”, ka thënë avokati Maks Haxhia.
Vetë Tahiri pretendon se nuk ka asnjë lidhje me grupin e Habilajve, ndërkohë që seanca ka vijuar me mbrojtjen dhe të të akuzuarit tjetër Jaeld Çela.
Kujtojmë se ish-ministri Saimir Tahiri u vu nën shënjestrën e organeve të drejtësisë në tetor të vitit 2017, pasi autoritetet italiane goditën një grup të strukturuar kriminal në trafikun e marijuanës, që drejtohej nga vëllezërit Habilaj, të afërm të Tahirit.
Në shtator 2019, Tahiri u shpall i pafajshëm për akuzat e trafikut të narkotikëve dhe grupit të strukturuar kriminal, por u dënua nga Gjykata e Krimeve të Rënda me 5 vjet burg për shpërdorim detyre, dënim i cili u konvertua me 3.4 vjet për shkak të gjykimit të shkurtuar. Vendimi i shkallës së parë u prish nga Gjykata e Posaçme e Apelit, e cila e riktheu çështjen për rishqyrtim, pasi u konstatuan parregullsi në proces.
Discussion about this post