Nga e hëna ka rinisur procesi i Vettingut në Polici, kësaj here me punonjësit e Shërbimit për Çështjet e Brendshme dhe Ankesat. Vettingu ka nisur me Albion Sinanin, Specialist në Drejtorinë e Trajtimit të Ankesave, në Shërbimin për Çështjet e Brendshme dhe Ankesat. Vettingu edhe në Polici përfshin shqyrtimin në tri shtylla, deklarimi i pasurisë; aftësia profesionale dhe integriteti i figurisë. Trupa vlerësuese është e përbërë nga Ana Kapaj, Elida Liko, Alban Laska.
Fillimisht ishte vendosur që Vettingu në SHÇBA të fillonte pas përfundimit të ‘filtrimit’ të drejtuesve të lartë të Policisë, por procesi në radhët e shefave ka ecur me ritme tejet të ngadalta. Në një vit që procesi i Vettingut në Polici ka nisur, procesi është mbyllur vetëm për 36 drejtues, 27 të konfirmuar, 4 të shkarkuar dhe 5 që janë vetëdorëhequr.
Vettingu në Polici u pezullua dhe gjykata Kushtetuese vendosi që të hartohet një ligj i ri brenda 6 muajsh, ndërsa e shpalli testin e Poligrafit si të papranueshëm për këtë proces.
Deri në konkretizimin e ligjit të ri, procesi do të vijojë me punonjësit e SHÇBA.
