Komisioni Qendror i Zgjedhjeve ka rinumëruar një pjesë të kutive të zgjedhjeve të 25 prillit, ku është zbuluar se disa parti i kanë rënë në qafë njëra tjetrës. Numëruesit kanë abuzuar apo vjedhur vota, duke ja hequr një kandidati, dhe duke ja shtuar padrejtësisht një tjetri.
Komisionerët janë treguar të kujdesshëm vetëm gjatë numërimit të votave për partitë përkatëse, ndërsa në numërimin e votave të kandidatëve, ata kanë mbyllur sytë, dhe kanë lejuar që secili të menaxhojë partinë e vetë, duke lejuar edhe shkeljet.
Nga kutitë që janë rinumëruar deri më tani nga KQZ, deputeti që ka përfituar më shumë vota të padrejta, është demokrati Zef Hila në Shkodër. Në vetëm 40 kuti të hapura, atij i janë dhënë 104 vota më tepër, të cilat i hanë hequr kryesisht drejtuesit të listës, Helidon Bushati.
Ndërsa mes socialistëve, vihet re se më shumë vota të të tjerëve janë regjistruar për Eduard Shalsin. Ai ka 86 vota të padrejta, ndërsa 20 vota plus ka edhe Elisa Spiropali. Të vjedhurit më të mëdhenj nga PS në Tiranë, janë Fatmir Xhafaj me -43 vota, dhe Belinda Balluku me -30 vota.
Tjetërsimi i votave nuk ka kursyer as kryetarët e partive. Me aq kuti sa janë rihapur në Durrës, Edi Rama ka -11 vota, të cilat, duke se kanë shkuar kryesisht për Rrahman Rrajën, i cili rezulton të ketë marrë 19 vota më shumë se sa i takonin. Ndërsa Bashës i janë hequr 21 vota dhe Berishës 11. Ajo që dukshëm ka marrë vota të padrejta nga PD në Tiranë, është Ledina Fratari, me 48 vota plus, vetëm në kutitë e hapura deri më tani.
Duke qenë se janë hapur vetëm disa kuti nga totali i tyre, kjo tregon se është vetëm maja e ajsbergut. Gjithsesi, kandidatët në vetvete nuk do të mbajnë përgjegjësi për këto tjetërsime. Do të jetë KQZ që do të vendosë masën e ndëshkimit të numëruesve, me gjobë, apo kallëzim në prokurori.
