Presidenti Bajram Begaj dhe Kryeministri Edi Rama do të udhëtojnë drejt New York për të marrë pjesë në punimet e përvitshme të Asamblesë së OKB.
E gjithashtu, në mesin e muajit shtator, Shqipëria pritet të marrë Presidencën e Këshillit të Sigurimit, ku ministrja e Jashtme Olta Xhaçka, pritet të drejtojë mbledhjen e hapjes.
Por ky moment nuk mund të anashkalohet nga Edi Rama, që pritet të shfaqet si një “lider global” duke drejtuar madje edhe mbledhjen e liderëve botërorë në Këshillin e Sigurimit.
Në anën tjetër, Presidenti Begaj do të jetë në mbledhjen e Asamblesë së OKB-së, ku në pamje të parë duket se po rivalizon Edi Ramën, të paktën në arenën ndërkombëtare, pak a shumë me një situatë të ngjashme si ajo e krijuar vite më parë mes Sali Berishës që mbante postin e Kryeministrit dhe Bamir Topit që ishte President.
Presidenti Begaj do të mbajë fjalën në emër të Shqipërisë në Asamblenë e Përgjithshme në 21 shtator, vetëm një ditë pasi Rama do të drejtojë mbledhjen e Këshillit të Sigurimit, për shkak të Presidencës që do të ketë Shqipëria.
E ndërsa Begaj e Rama do të qëndrojnë për të paktën 7 ditë në Shqipëri, duket se frerët e shtetit do të merren nga Kryeparlamentarja Lindita Nikolla dhe zv.Kryeministrja Belinda Balluku.
Kjo e fundit ndoshta nuk e ka problem mungesën e Kryeministrit, pasi është mësuar të drejtojë pothuajse të gjitha mbledhjet e Qeverisë, edhe kur Rama ndodhet në Shqipëri, madje në zyrën e tij në godinën e Kryeministrisë.
Discussion about this post