Hiqet rryma e subvencionuar për kompanitë nga industria ushqimore dhe ngrihet çmimi i bukës së bardhë dhe gjysmë të bardhë prej 450 gramë në 33 denarë, këtë e vendosi Qeveria e Republikës së Maqedonisë së Veriut.
Këtë e bëri të ditur kryeministri Dimitar Kovaçevski në konferencën e përbashkët për media me ministrin e Ekonomisë, Kreshnik Bekteshi.
Siç tha Kovaçevski, kaloi kohë e mjaftueshme që nga miratimi i pakos së fundit të masave kundër krizës, ndërsa një pjesë e kompanive ushqimore nuk i ulën çmimet e produkteve të tyre. Këtë e kanë konfirmuar kontrollet inspektuese.
Ai theksoi se masat qeveritare për mbështetje nuk u miratuan që disa të jenë të privilegjuar në favor të të tjerëve, që dikush të pasurohet, që individë të kenë përfitim dhe që të goditet xhepi i qytetarëve, por me qëllimin e vetëm – të ulen çmimet e produkteve bazë dhe t’u ndihmohet qytetarëve.
Ngrirja e çmimit të bukës së bardhë dhe gjysmë të bardhë do të vlejë deri 31 maj të vitit 2023.
“Nuk do të lejoj rritje të pajustifikuara të çmimeve. Ka kaluar një periudhë e mjaftueshme që nga miratimi i pakos së fundit të masave kundër krizës që çmimet të harmonizohen sepse ndihma nga shteti ishte në kohë dhe reale.
Edhe pse kompanitë ushqimore kanë marrë energji elektrike të subvencionuar, ato nuk i kanë ulur çmimet e produkteve të tyre apo i kanë ulur në mënyrë të parëndësishme. Kjo vlen për disa nga prodhuesit e produkteve ushqimore bazë. Disa ulën çmimet nga shtatë në 12 për qind.
Prandaj në mbledhjen e sotme të qeverisë anuluam masën për energji elektrike të subvencionuar. Prodhuesit e ushqimit do të furnizohen me energji elektrike në përputhje me Ligjin për Energjinë dhe rregullat për furnizim me energji elektrike.
Po ashtu e ngrijmë çmimin e bukës së bardhë dhe gjysmë të bardhë, të prerë në feta ose të plota, në 33 denarë, gjegjësisht çmimin prej 33 denarë për bukë me peshë prej 450 gram e më shumë, ndërsa për bukën nën 450 gram sipas peshës së bukës është caktuar çmimi deri në 33 denarë”, theksoi Kovaçevski.
Ministri i Ekonomisë, Kreshnik Bekteshi theksoi se kompanitë ushqimore nga një prilli tashmë nuk do të kenë rrymë të subvencionuar.
Discussion about this post