Kryeministri Edi Rama emëroi ditën e sotme Ulsi Manjën në postin e ministrit të Drejtësisë në qeverinë “Rama 3”, pozicion që e mbante Etilda Gjonaj.
Ulsi Manja fitoi mandatin e deputetit në zgjedhjet e 25 prillit, ndërsa gjithashtu ka drejtuar dhe Komisonin Hetimor për shkarkimin e Presidentit Ilir Meta.
Emri i Ulsi Manjës u vendos në qendër të vëmendjes në momentin kur gazeta e njohur gjermane “Bild”, publikoi përgjimet e dojes 184 për përfshirjen e funksionarëve të lartë të qeverisë në shit-blerjen e votës.
Në biseda dëgjohej zëri i Ulsi Manjës, Damian Gjiknurit, Xhemal Qefalisë dhe ish-ministrit të Brendshëm, Saimir Tahiri që diskutonin me persona të botës së krimit për të siguruar mbështetje në zgjedhje. Vetë Ulsi Manja, është kapur në përgjime duke i ofruar pozicion pune më të lartë shefit të policisë në Dibër, Robert Agës.
Vetë ministri i Drejtësisë u shpreh aso kohe në një studio televizive se nuk i intereson se çfarë thonë mediat ndërkombëtare, duke shtuar se dosjen do e dërgonte në gjykatë.
“Nuk më intereson çfarë përmend asnjë lloj shtypi, asnjë lloj portali dhe asnjë media vendase apo ndërkombëtare përsa kohë nuk kanë folur institucionet përgjegjëse të vendit im. Unë do të flas për të dyja ato dosje politikisht pasi të flasë drejtësia. Unë jam një nga njerëzit që kryetari i opozitës më ka përmendur për dosjen 184 dhe nuk i jam përgjigjur deri tani dhe nuk kam ndërmend ti përgjigjem akoma deri ditën kur dosja 184 të shkojë në gjykatë dhe të bëhet e ditur për opinionin publik, çfarë vepre ka, kush janë personat e përfshirë dhe në rast se do të dalë e kundërta, natyrisht secili do të vendosë dinjitetin e vet në vend”, tha Manja.
Ditën e sotme u mbajt Asambleja e PS ku kryeministri Edi Rama prezantoi emrat e kabinetit të ri qeveritar, ndërsa nuk munguan ndryshimet as në Sekretariate apo Drejtoritë e qarqeve.
