Deputeti Erion Braçe ka reaguar në lidhje me librin e historisë së fëmijëve të klasës së katër në Shqipëri, ku modeli i fshatit shqiptar është ilustruar me foton e vilave “Rolling Hills”, një prej lagjeve më të pasura të Tiranës.
Braçe në një postim në rrjetet sociale u shpjegon fëmijëve se fotoja nuk tregon fshatin e zakonshëm që janë në Shqipëri. “Fshati është i lirë, pa mur të lartë e të fortë që e rrethon cep e më cep; Fshati nuk ka frikë, roje, kamera vëzhguese, makina Bentley, Mercedes G, Maybach, Maserati, Porche, Rover etj; Fshati ka traktorë, zetorë, autokombajna, karroca. Fshatin e zakonshëm e ruan bashkëjetesa, prej saj askush në fshat nuk vjedh komshiun, as në punë e as në lagje;” shkruan Braçe.
Por, veç alarmit që ngre ish-zëvendëskryeministri Braçe, i cili ka qenë në detyrë kur është hartuar ai tekst që vetë e denoncon sot, mbetet shqetësim pikërisht për mashtrimin e madh që ne si shoqëri po u bëjmë fëmijëve tanë që në bankat e shkollës, duke ngritur tek ata teza iluzionare, që nuk kanë asnjë lidhje me realitetin shqiptar.
