Cristiano Ronaldo i është rikthyer zakonit të vjetër, e të bukur, të të shënuarit të golave me peshë, duke e bërë këtë gjë gjatë mbrëmjes së sotme, me Al-Nassr që siguroi një fitore shumë të rëndësishme, në ndeshjen e dytë të saj në Arab Club Champions Cup, përballë tunizianëve të USM Monastir.
Takimi i luajtur në King Fahd Stadium nisi disi i komplikuar për verdheblutë, të cilët kaluan në avantazh, falë sulmuesit Talisca, vetëm në fund të pjesës së parë.
Megjithatë, në pjesën e dytë, skuadra e USM, barazoi shifrat në minutën e 66’, falë një autogoli fatkeq, të Al Oujami. Ishte minuta e 74’, kur “Asi” portugez, Cristiano Ronaldo, vendosi që të merrte skenën. Falë një krosimi të përpiktë të Sultan Al Ghannam, CR7 goditi saktë me kokë duke mposhtur portierin Ben Said.
USM, provoi që të barazonte shifrat por sauditët u mbrojtën mirë duke mos lënë që të rrezikohej porta e tyre, si dhe duke realizuar vetë, edhe dy golat (Al Amri, 88’; Al Aliwa, 90’) që mbyllën përfundimisht takimin me shifrat 4-1. Me këtë fitore, Al Nassr shkon në kuotën e 4 pikëve në grupin e saj, po aq sa Al Shabab, ndërkohë prapa dyshes saudite, qëndron Zamalek i Egjiptit me tre pikë./m.b /gijotina.com
Discussion about this post